uMthunywa
Nomthandazo Ndlovu
I-BARLEY ngesinye sezilimo ezilenzuzo emangalisayo njalo singesinye sezilimo esilandela ingqoloyi ngokudlisa.
Ekhuluma loMthunywa uMnumzana Gibson Nare ongumlimisi uthe abalimi kabazame ukulima i-barley ngoba ilemali kakhulu ngoba kunengi ekwenziwayo ngayo okungabanika inzuzo.
“Inengi labalimi kalilimi i-barley ikanti yisilimo esingabanceda kakhulu, zikhona indawo lapho elinywa khona njalo labo abayilimayo ngileqiniso lokuthi bayayitshaya sibili imali ngoba into ihambelana labongqoloyi.
“Izinto ezenziwa nge-barley yizinto inengi labantu elingeke liphile lingelazo, i-barley yenza utshwala kanye lefulawa okuyinto eziqakathekileyo kakhulu lapha kwelakithi, amankampani ayenza utshwala lalawo abhekhayo sengathenga kumlimi ozimiseleyo sibili oyilimayo,” kutsho uMnu Nare.
UMnu Nare uqhubekele phambili wathi ukulima i-barley akuhluphi ngitsho ngoba iyisilimo esenelisa ukumelana lendlala.
“I-barley ayihluyiphi ngitsho ukulima, yisilimo esiphangisa ukuvuthwa njalo ngesikhathi sebusika iyavuma, iyenelisa ukumelana lokoma ngeke umlimi akhale ngesivuno esehlileyo ngoba kungela zulu, iyavuma loba amanzi engeneli.
“Kuqakathekile ukuthi abalimi bazame ukulima ezinye izilimo ezitholakala kwamanye amazwe ukuze ilizwe lingalahlekelwa zimali lithenga kwamanye amazwe angomakhelwane bethu. Nxa izilimo ezinjengalezi zilinywa kungasiza sibili ekuletheni imali yakwamanye amazwe elizweni kanye lakumlimi,” kuphetha uMnu Nare.
