IYADLALISWA IMALI YEKHANSILI. . . IByo City akula lutho

31 May, 2018 - 00:05 0 Views
IYADLALISWA IMALI YEKHANSILI. . . IByo City akula lutho

uMthunywa

YiNtatheli kaMthunywa
NXA inkokheli zeqembu lebhola iBulawayo City zingalalisa inkophe, leliqembu lingaphanga lixotshwe kuligi yeCastle Lager lonyaka.

Izakhamizi zedolobho lakoBulawayo angeke zisolwe ngokutshinga ngoba imali yekhansili ingabe igelezela ezikhwameni zabanye abantu endaweni yokuthi kuqiniswe leliqembu.

IBulawayo City ingaphansi kwesikhwama sekhansili yedolobho.

Ngemva kwemidlalo elitshumi lambili, ithimu le isijikele imiklomelo elitshumi kuphela esakeni. Loba sekutheni, kuyazikhanyela ukuthi iqembu leBulawayo City liyavalelisa kuligi yenguqu ephakemeyo kulisizini.

Ukusadalala kwaleliqembu sekufike emaphethelweni ngoba imiklomelo yayo kungalane iveza ukuthi okwalithimu sekwehlule.

Ukungena kweBulawayo City ngo2017 kwaletha injabulo kubalandeli benguqu koNtuthu. Khathesi sekuzwisa usizi. Imidlalo eseleyo anduba kufikwe kukhefu lesizini, Amakhosi azadibana leCaps United leMutare City.

Kuliviki anxuse iYadah ekhaya. Lokhu kuveza ukuba nxa iBulawayo City izimisele ukubambelela kuligi yePSL kuzamele inqobe imidlalo yonke.

Ngomnyaka ophelileyo ngesikhathi esifanayo, iBulawayo City yayisadalala njalo, yaphetha isizini isinde ukuxotshwa, okuchaza ukuthi iqembu leli alikaphakami kumdlalo wenguqu esigabeni saphezulu.

Umqeqetshi wayo uAmini Soma Phiri usephume emphakathini ecela ukuba wonke umuntu okuqembu aphakame, ancedise ukuthi liqakame.

“Kumele sikhuthalele ukusukumisa iqembu lethu. Iqembu ukuze lisuke kunombolo elikuyo kuligi, kumele kusetshenzwe nzima,” nguPhiri ekhuluma lentatheli okwakuqala lokhe waphiwa umsebenzi kuBosso.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds