uMthunywa
YiNtatheli kaMthunywa
AMANTOMBAZANA adlalela iqembu likanobhutshuzwayo ele-Inline Academy aphinde umphehlo ngokuba zintshantshu zeligi yeThembalethu Southern Region Women’s Soccer League.
Ukuze bayithwale linkezo, abadlali be-Inline Academy banqobe iHighlanders 2-1 enkundleni yeMandwandwe High ngempelaviki.
Abadlali be-Inline Academy uSiphosenkosi Gumede loSithabile Dlodlo ngesigaba sesibili bathele amabhola amabili emambuleni, ayiwo atshonise iRoyals ngomdlalo wokucina.
Umaneja waleliqembu uPriscilla Ncube uthe kulisizini badlale ngobuciko baphezulu ukwedlula kweminye iminyaka.
“Siqale sisithi angeke sifike lapha kodwa nanko sesikwenzile. Sidlale kuhle, sathola imiklomelo engaphezulu kwe-50. Okusithabisa kakhulu yikuthwala inkezo yeligi isizini ingakapheli,” kutsho uNcube.
Kuligi le, umgadli we-Inline Academy uPeacemore Kanende usehlohle amabhola angamatshumi amabili.
Iqembu ebelihleli iInline Academy isithende yiMagwegwe Stars. Azamile amantombazana eMagwegwe kwehlula ngesigaba sesibili seligi ukuthi bathole imklomelo.
IMagwegwe Stars zintshantshu zomnyaka odluleyo.
Kusenjalo inhlanganiso yeThembalethu Foundation isibike ukuba izimisele ukusekela iligi yenguqu yamantombazana kuligi esemhlubulweni ongezansi yelizwe.
Lonyaka kudlale amaqembu alitshumi njalo athenjiswa ukuphiwa imivuzo ebalisa ikhithi, amabhola lemendulo. Intshantshu izathola inkezo njalo labadlali abenze kahle umnyaka wonke bazaphiwa okuthile.
IThembalethu Foundation ibiqhuba imidlalo leligi le kusukela ngo2016 lapho ebiqoqa umncintiswano obudlalelwa ngamaqembu ayisitshiya galombili.
Umgcinisihlalo weSouthern Region Women’s Soccer League uTakundwa Chimundiya uncome inyathelo leThembalethu Foundation wathi kuyisiqalo sobudlelwano obukhulu.
“Siyaphambili ngenguqu yamantombazana nxa sithola usekelo olunje oluvela kuThembalethu Foundation. Ibhola lamantombazana selidonse isikhathi eside lingasekelwa. Abadlali bebeqeda umnyaka bedlalela amahala. Nxa sekulosekelo, amathimu azadlala ezimisele ngoba sekulomvuzo.”
UFungai Nyamutukwa-Mpfeka oweThembalethu Foundation uthe loba kade baqala ukusebenzelana lenguqu yamantombazana, ukuphatheka kuligi engezansi yelizwe kuzakhweza isisindo somdlalo.
“Umntwana oyinkazana odlala inguqu uligugu kithi. Sifuna ukuthi ithalenta lamankazana libatshazwe, lisekelwe ukuze isizwe siphakame kwezemidlalo,” kutsho uNyamutukwa-Mpfeka owake wadlalela iqembu lesizwe amaMighty Warriors.
Impumela yeThembalethu League:
Inline 2-1 Highlanders Royals, New Orleans 2-0 Byo Poly, Magwegwe 2-1 Ubuntu, Sobukhazi 0-2 ZRP Bulawayo.
