uMthunywa
Cornelius Luphahla
KULANDELA indaba yexoxo lelokitshini leThorngrove koBulawayo ephume kuphephandaba kumaviki amabili edluleyo sekulelinye futhi ixoxo eselikhathazile endlini yelinye iKhaladi.
Kuzwakale ukuthi ixoxo leli lihlupha endlini yelinye inina elithande ukwaziwa ngokuthi nguNkosikazi Reed nanko phela kuthiwa libonakala ukusa kwamalanga noma nje lingaseyilo leli elilamazinyo elatshiya amanye amadoda ebangwa lezibi.
UMthunywa wenelise ukukhulumisana loNkosazana Sibongile Ndlovu oyisakhamuzi sakule indawo wachaza ukuthi ixoxo leli liyake libonakale phandle kwale indlu.
“Ixoxo leli siyake silibone esangweni lale indlu noma nje abantu belesaba. Isimanga yikuthi aliyi kwenye indawo ngaphandle kwakule indlu,” kuchaza uNkszn Ndlovu.
UMthunywa ukhulumisane loNkkz Reed wachaza ukuthi ixoxo leli selimkhathazile njalo sephelelwe ngamasu okulixotsha.
“Sengikhathele ngalelixoxo ngoba ngingaze ngilibulale ngibona sokuthutshe elinye elifana xathu lalo. Isimanga yikuthi ixoxo leli liyangena endlini noma kuvaliwe ngilibona seliphakathi.
“Ekuqaleni ngangilikhiphela phandle ngithi yisinanakazana sikaNkulunkulu kodwa ngaphetha sengilibulala ngoba laselingihluphile. Kuthe kwelinye ilanga ngiqeda ukulibulala ngangena endlini ngisiyadinga iphalafini yokulitshisa ngathola lingasekho,” kulandisa uNkkz Reed.
Wengezelele wathi ukunyamalala kwexoxo leli kwamethusa kakhulu wahle wakholwa ukuthi akusixoxo nje.
“Ixoxo leli ngalitshiya lifile phandle kodwa ngathi ngingena endlini ngathola selizihlalele phezulu kwesofa lapho engihlala ngilibona khona. Khathesi sengiphelelwe ukuthi ngithini ngalo,” kulandisa uNkkz Reed.
UNkkz Reed ubuye njalo wachaza ukuthi ixoxo leli elimhluphayo libomvana njalo alikho likhulu njengalelo alizwa kuviki ephelileyo okwakuthiwa lilamazinyo.
