uMthunywa
Msilisi Dube
KULEXHEGU lesigabeni seNgqoya, eTsholotsho elizibulale ngokuzibophela kuyonale iviki emzini walo ngenxa yesikwelede sembuzi obekumele liyihlawule induna.
Umuyi uGibson Moyo obeleminyaka engu-58 yokuzalwa kubikwa utholakale elenga esihlahleni esisegumeni lakhe ngoMvulo ekuseni.
Iphephandaba leli lizwe ukuthi ngenyanga ephelileyo umuyi wabanjwa xhaka elele lomfazi kamakhelwane ovezwe ngokuthi nguMaSiziba okwabangela ukuthi ayethonisiswa emthethwandaba wenduna uNgqoya.
Esinye isakhamuzi sakulindawo esiziveze ngokuthi nguKhulekani Mdlongwa sithe umuyi watholakala elecala enduneni.
“Ngalokhu induna uNgqoya yamhlawulisa imbuzi ezine ngenxa yokungaziphathi kwakhe lokhu.
“Ngelanga sisizwa ngokubhubha kwakhe samangala ngoba sasimcine ezinathela utshwala lathi ezitolo njalo samangala sisizwa umbiko wokuthi uzibophele,” kulandisa uMnu Mdlongwa.
Elinye ilunga lemuli elithintane lentatheli le ecingweni liveze ukuthi umuyi wazibophela ngoba ilanga lokuthi abhadale inhlawulo yecala lakhe selifikile.
“Ubehlala engokhathazekileyo ngokuthi inhlawulo yakomakhelwane uzayithatha ngaphi njalo ngicabangela ukuthi lokhu yikho obekumenza azidle ingqondo yikho waze wabona kungcono ukuthi azibophele.
“Wazibophela evela etshwaleni, wabonakala ekuseni elenga esihlahleni esisegumeni,” kuveza lelilunga elingathandanga ukuqanjwa ngebizo.
Isikhulumi samapholisa esabelweni seMatabeleland North, uInspector Siphiwe Makonese uthe kakalutholi loludaba ngakho uzadingisisa ngalo.
