uMthunywa
NguMsilisi Dube
KULEXHEGU elileminyaka yokuzalwa engu-63 elihlala eSiabuwa eBinga elimiswe phambi komthethwandaba lisetheswa icala lokugqula umzukulu walo iminwe ngenduku ngoba etshontshe amazambane emasimini.
Umsolwa uJaphet Mumpande wenze ihlazo leli mhlaka 4 Mabasa ngomnyaka ophelileyo ngesikhathi aze afice umamangala uGibson Ndlovu esiphuna amazambane emasimini.
Umantshi uMnumzana Stephen Ndlov uzwe ukuba umsolwa wathi esedale icala leli wasesizwa ukuthi uyadingwa ngamapholisa wabaleka emzini wakhe.
Kuzwakale ukuba ngelanga leli umamangala wayelindile emasimini ngakho wasesuphuna amazambane ukuba adle njengoba iphango laselimhlasele.
Kubikwa umsolwa wasuka ngekhaya waya emasimini wafica umamangala esuphuna amazambane wagamula uswazi wamkatsa andubana athathe induku ayeyiphethe wamgqula ngayo iminwe esithi ufuna ukumcinisa ubusela.
Inkundla ibuye yezwa ukuba umamangala wabika udaba emapholiseni. Umsolwa kubikwa wathi esizwa ukuba udingwa ngamapholisa wabaleka ngekhaya waze wabuya ngenyanga ephelileyo kuwonalo umnyaka.
Kubikwa umamangala wathi esezwe ukuba umsolwa usebonakele wabuye wayabika njalo udaba emapholiseni okwabangela ukuba umsolwa abotshwe.
Ebuzwa ngumantshi uMnu Ndlovu umsolwa ulivumile icala lakhe lokutshaya umamangala wathi wamtshaya ngoba esephuke umoya ngoba edle izilimo zakhe.
Ngemva kokuzwa ubufakazi lobu umantshi ugwebe umsolwa ukwenza i-community service okwamahola angu-105 enkambeni yamapholisa.
