uMthunywa
Msilisi Dube
IQEMBU labadlali abadumileyo koBulawayo iVictory Siyanqoba Theatre selipheke umdlalo okhuluma ngempilo kaJoshua Nyongolo Nkomo ukuze isizwe sazi ngeqhawe leli.
Umdlalo lo ubizwa ngokuthi “The house of Joshua” ukhuthaza ukubambana, ukusebenza ndawonye kunye lokuthula elizweni.
Kubikwa inengi labantu kaliyazi imbali yeqhawe leli njalo kalihloniphi amazwi awakhulumayo osekubangele ukuba abantu babizane ngemihlobo etshiyeneyo.
Umqondisi weqembu leli uDesire Moyo odume kakhulu ngokuthi nguMoyoxide ubikele iphephandaba leli ukuba upheke umdlalo lo ukuze afundise intsha kunye labadala ngempilo kaMafukufuku.
“Sinanzelele ukuba abantu abanengi bakhuluma izinto abangazaziyo ngomdala wethu. Thina njengeqembu labantu abasakhulayo sibone kuqakathekile ukuba sipheke umdalo ofundisayo njalo ubuye uthokozise abalandeli bethu ngemisebenzi yeqhawe leli.
“Emdlalweni lo uNkomo simveza njengomuntu owayethanda njalo ekhuthaza ukubambana kakhulu. Ungananzelela kulezi insuku abantu babizana ngemihlobo etshiyeneyo. Lokhu akulunganga ngoba singakabizani ngemihlobo kumele sibekwazi ukuthi singabantu abansundu kuqala,” kuchaza uMoyoxide.
UMoyoxide uqhubekele phambili wathi ukuze isizwe sithuthuke kumele sisebenzele ndawonye sibambene.
“Umdala ngumuntu owayethanda ukusebenza labantu. Wayengafuni umuntu obiza omunye ngomhlobo wakhe ngoba lokhu kudala inzondano. UMafukufunku njengeqhawe wayekhuthaza ukuba abantu basebenze ndawonye.
“Ungananzelela nxa abantu bengabambana kuba lentuthuko ekhanyayo kodwa singabizana ngokuthi abanye ngamaShona kumbe amaKalanga siyabe sibulalana sodwa njengesizwe sabansundu,” kuchaza uDesire.
Uphethe ngokukhuthaza uzulu ukuba ukuze isizwe siphumelele kumele sisebenze gadalala njengokutsho kukaNkomo.
“UNkomo wasitshela ukuthi nxa sifuna imali kumele sisebenze gadalala ngoba inotho isemhlabathini kunye lezandleni zethu.Njengesizwe kumele sivuke ebuthongweni bethu sincedisane ukuze sithuthuke.
“Uhlupho esilalo yikuthi kasilamali yokwenza eminye imidlalo efundisayo.Okwakhathesi akulamuntu osincedisayo ngemali nxa sicindezela imidlalo kumbe ingoma zethu okwenza kube nzima ukuba sithuthuke kwezemidlalo,” kuphetha uMoyoxide.
