uMthunywa
YiNtatheli kaMthunywa
UGATSHA lweSport and Recreation Commission lubika ukuba soluqede imali enengi lukhuthaza iziphathamandla zemidlalo etshiyeneyo ukuthi zikhuthalele ukuthola ulwazi kwezemidlalo.
Kubikwa iSRC isinanzelele ukuthi kulenkokheli ezithi zingakhethwa ezikhundleni zikhohlwe ukuthi kumele zifunde okuthile ngomdlalo.
ISRC okuyiyo inhlanganiso elawula imidlalo yonke kuleli, ithe ngenxa yokuyekethisa kwenkokheli, ilahlekelwa yimali njalo ichitha isikhathi esinengi izama ukucebisa imidlalo ngemthetho lokunye okuqakathekileyo.
Lokhu kuza ngemva kokuba iSRC ikhuze inhlanganiso zemidlalo ukuthi zitshiyane lomkhuba wokwekela ukubhadala isixha esithile njengokulotshwe kuziqondiso zayo.
UMthunywa ukhulume loCharles Nemachena umqondisi omkhulu weSRC othe ukuthola ulwazi kulakho ukuletha impucuko kwezemidlalo.
“Kulenzisuku sesiphila ezikhathini zempucuko njalo kumele lathi sibone ukuthi abaphathi bemidlalo etshiyeneyo balolwazi olugcweleyo mayelana lemidlalo le.
“Iminyaka yonke siyazama ukunxusa imidlalo esilayo kuleli kuzifundo kodwa balutshwane abantu esibafundisayo. Ngakho ke sikhuthaza inkokheli zemidlalo ukuthi ziye esikolo, ukuyafundela ukuphathwa kwemidlalo,” kutsho uNemachena.
Ingcitshi ezibona ngokuphathwa kwemidlalo kuleli, zitshona zikhonona ngenkokheli ezehluleka ukuphatha imidlalo njalo zithi lesi yisizatho esimqoka esenza imidlalo yakuleli ingathuthuki.
Inhlanganiso yeSRC ndawonye leZimbabwe Institute of Management zisebenzelana ndawonye ngenhloso yokufundisa abaphathi bemidlalo ehlukeneyo kuleli njalo umuntu ulakho ukuthi aqeqetshe kuzifundo zeDiploma kuSports and Administration, kuleli.
Ezinye izikolo ezifundisa abadlali mayela leziphathelane lemidlalo yiyunivesithi yeNust, eyeBindura, iZimbabwe Open University kanye lenhlanganiso yeZimbabwe Olympic Committee.
