uMthunywa
Nkosilathi Sibanda
NGENYANGA kaMabasa iHighlanders yanqoba iDynamos kuhlohle uOzias Zibande. NgeSonto ziyadibana njalo inkuzi lezi kukhangelelwe ukuthi kuhlohle umfana omutsha uTafadzwa Sibanda.
Umgadli omutsha lo usemlonyeni yabalandeli bezikaMagebhula kodwa osevalweni kuleliqembu ngumqeqetshi uMadinda “Khathazile” Ndlovu.
UMadinda uphakathi kwetshe lembokodo ngeSonto nanko phela kumele anqobe, atshengise ukuthi uyakha ngoba abalandeli sebeqala ukusola umsebenzi wakhe.
UMadinda utshayelwe ukhwelo kumdlalo owedluleyo iBosso inxuse iNgezi Platinum esuke yanqoba nge 2-1.
Akuzange kuthokozise muntu ukunqotshwa kwaleliqembu eselikhanya lisehluleka ukunqoba ekhaya layo.
Abalandeli bazadonsa amehlo befuna ukubona amaqhinga amatsha omqeqetshi nanko phela iqembu lidibana lesitha esidala.
Umdlali osanda kungeniswa eqenjini uSibanda kukhangelelwe ukuthi ahlohle ngoba sekubonakale ukuba ulakho ukwenza izimanga mhla iqembu leli lidibana leDynamos.
Abalandeli benguqu bafuna ukufakaza ukuthi kulisizini yiphi ithimu enkulu phakathi kwazo zombili.
Kuhlandla lakuqala lesizini iHighlanders yanqoba, uZibande walibethela emambuleni ngomzuzu wesi-45 wenza imbali.
Kubalandeli beHighlanders kuzakhunjulwa ukuba ngesizini edluleyo, intandokazi yalithimu uPrince Sibanda waqeda isiqalekiso sokunqotshwa kweHighlanders yiDynamos okweminyaka elitshumi.
Umdlali kaMadinda omutsha laye ukhangelelwe ukuthi enze okufanayo, abeyinsika yomdlalo lo.
Kuliviki iphephandaba likazulu lixhumane loMadinda obike ukuba umdlalo uwulindile.
Umqeqetshi lo ubike ukuba uyavuma ukuthi uyenza amaphutha kodwa kulumdlalo kasoke avuzise.
“Siwumelele umdlalo. Ukunqoba yikho esikufunayo ngazo zonke indlela. Besilungiselela umdlalo njengayo yonke,” kutsho lumqeqetshi.
Ukubeka egcekeni ukuthi laye kuyamkhathaza ukuthi sekudlule imidlalo eminengi bengadlali kuhle.
Kusenjalo, iDynamos ingabe ilande into eyodwa eBarbourfields. Iqembu leli lidinga ukuchumisa abasekeli beBosso ngokuyinqoba. Akulamdlalo oqakatheke njengalo kuleli iqembu.
Sekukudala iDynamos yacina injabulo kulisizini, okutsho ukuba ukunqoba iBosso kuyabe kulikhekhe kubafana beDeMbare.
Ukunqoba kwayo iDynamos kuzayitshiya izitshaya isifuba, ilethemba lokuthi ingaphenduka embusweni wenguqu yakuleli loba nje isikhatshana lenkezo.
Umqeqetshi weDeMbare uLloyd Mutasa uyabe engekho kulumdlalo ngoba esenkambeni yeqembu lesizwe amaWarriors.
“Yebo sibili sadliwa kuhlandla lakuqala. Akutsho lutho ngoba lo ngumdlalo esiwulungiselele ngendlela eyehlukeneyo. I-Highlanders yisitha sethu sakuqala njalo imidlalo yethu layo ihlala ihlabusa. Sizadlala ngokuzimisela sikholisise ababukeli,” kutsho uMutasa ekhuluma loMthunywa ecingweni.
