uMthunywa
YiNtatheli kaMthunywa
INHLANGANISO yeThembalethu Foundation isibike ukuba izimisele ukusekela iligi yenguqu yamantombazana kuligi esemhlubulweni ongezansi yelizwe.
Kubikwa amaqembu alitshumi azadlala ngaphansi kwaliligi kulisizini azaphiwa imvuzo ebalisa ikhithi, amabhola lemendulo. Intshantshu izathola inkezo njalo labadlali abenze kahle umnyaka wonke bazaphiwa okuthile.
IThembalethu Foundation ibiqhuba imidlalo leligi le kusukela ngo2016 lapho ebiqoqa umncintiswano obudlalelwa ngamaqembu ayisitshiya galombili.
Kulisizini iligi le ilamaqembu abalisa iInline Academy, New Orleans, Highlanders Royals, ZRP Bulawayo, Blackboots, Magwegwe, Ubuntu, Sobukhazi, Bulawayo Polytechnic le Street Set.
Umgcinisihlalo weSouthern Region Women’s Soccer League uTakundwa Chimundiya uncome inyathelo leThembalethu Foundation wathi kuyisiqalo sobudlelwano obukhulu.
“Siyaphambili ngenguqu yamantombazana nxa sithola usekelo olunje oluvela kuThembalethu Foundation. Ibhola lamantombazana selidonse isikhathi eside lingasekelwa. Abadlali bebeqeda umnyaka bedlalela amahala. Nxa sekulosekelo, amathimu azadlala ezimisele ngoba sekulomvuzo.”
UFungai Nyamutukwa-Mpfeka oweThembalethu Foundation uthe loba kade baqala ukusebenzelana lenguqu yamantombazana, ukuphatheka kuligi engezansi yelizwe kuzakhweza isisindo somdlalo.
“Umntwana oyinkazana odlala inguqu uligugu kithi. Sifuna ukuthi ithalenta lamankazana libatshazwe, lisekelwe ukuze isizwe siphakame kwezemidlalo,” kutsho uNyamutukwa- Mpfeka owake wadlalela iqembu lesizwe amaMighty Warriors.
Kusenjalo isivumelwano seThembalethu Foundation leligi yamantombazana sesivule amathuba okuthi lenhlanganiso ezikumabhizimusi zincedise abadlali bebhola.
Ngemva kokuzwa ngempumelelo yenguqu yamantombazana koBulawayo uCuthbert Ncube oweUnited Nations World Tourism Organisation (UNWTO) inikeze impahla yama-sanitary pads kubadlali.
UNcube uthe kuqakathekile ukuthi abantwana abangamankazana bakhuthazwe ukudlala inguqu.
