uMthunywa
UKUPHUMELELA kwezemidlalo kugxile ekuthuthukiseni lokulolonga ithalenta labantwana abasezikolo, kutsho uAndrew Langa, uMphathintambo wezemidlalo kuHulumende.
ULanga ukhuthaze iziphathamandla zemidlalo kunhlanganiso yeAfrican Union Sports Council Region 5 ezethekelele koBulawayo ukuthi zitshintshe ingqondo ngokukhangela imidlalo yezikolo.
Inkuthazo kaLanga iqonqoselwe njalo nguMvuzo Mbebe unobhala weAUSC Region 5 kanye loShepande Machacha, isikhulu semidlalo kuAU Commission.
Ekhuluma kumbuthano omkhulu owe-AUSC Region 5, wokusungula inhlelo zokukhokhela imidlalo koBulawayo kuliviki, uLanga uthe ingqubekela phambili isezikolo.
“Izikolo yizo insika yokuphumelela kwamazwe ethu kumincintiswano yaphezulu. Intshantshu ezibatshazwa kumaOlympics lakwezinye inkundla zivela ezikolo. Kuqakathekile ukuthi amazwe angaphansi kweAfrican Union Sports Council Region 5 aqale ukukhangelisisa ithalenta elisezikolo.
“Ngikhuthaza ukuba sonke sizimisele ukuphakamisa labaqeqetshi, ukuze amazwe abelememdulo kumincintiswano,” nguLanga lo, ophinda abengusihlalo wequla labaphathintambo bezemidlalo kunhlanganiso yeAU.
Umbuthano we-AUSC Region 5 uhlanganise amazwe wonke angeZansi yeAfrica njalo umhlangano lo uzaphela kulimpelaviki.
Umhlangano lo uzaphawula uhlelo olutsha lokuqhutshwa kwemidlalo olubizwa ngokuthi yi-Podium Performance Programme.
Ngaphansi kwaloluhlelo, amazwe akuAUSC Region 5 ahlose ukwengeza inani lemendulo ngendlela eyahlukileyo kodwa encedisa ukuthi abadlali bancintisane lentshantshu.
“Ngiliphosela ingqobe yokuthi sisebenze sonke kuhlelo lwePodium Performance Programme. Lesi yiso isikhathi sokuthi silolonge abantu abazabuya lemendulo kuyo yonke imincintiswano. Sesiqalisile ukulolongela imidlalo yamaOlympics ka2020 eJapan, ama-All-Africa Games ka2015 laka2016.
UMachacha, esethula umbiko wakhe ovela esigodlweni seAfrican Union uthe kubalulekile ukuthi ohulumende beAfrica baqine ngokulolonga abantwana.
Uncome amazwe wonke akuAUSC Region 5 ngokukhokhela kwezemidlalo iAfrica yonke.
“Ngithanda ukutshayela izandla lonke kuqula leAUSC Region 5 ngoba liyenelisa ukuqhuba ezemidlalo ngezinga eliphezulu.
“Inhlanganiso yeAfrican Union iyazigqaja ngemisebenzi eqhutshwa ezansi yeAfrica.”
ULanga ubikele umhlangano ukuthi isizwe seZimbabwe sizakwenza ngcono kumidlalo yamzwe ezalandela ngoba isilempahla yakulezinsuku eyalethwa yikuqhutshwa kwemidlalo yeAUSC Region 5 Under 20 Youth Games ngoMpalakazi ka2014.
“Ukuqakatheka kwemidlalo emphakathini angeke sikuthathe kancane. Ezemidlalo ziletha inguquko emangalisayo empilweni zabantu kanye lakumkhonomi wamazwe.
“Ukuqhuba kwemidlalo yeAUSC Region 5 koBulawayo ngoMpalakazi odluleyo kuligugu njalo akusoke kwakhohlakala kuzilwane zeZimbabwe.”
