uMthunywa
Nkosilathi Sibanda
ABADLALI bethenisi kuleli sebekhuthazwe ukuthi bazibonakalise ngokuphumelela kumncintiswano yaphezulu nxa befuna ukukhethwa ukuthi bayemela isizwe, nanko phela sekuqoqwa imncintiswano emitsha lonyaka.
Sekugcwele ukukhonona okuvela kubaqeqetshi labanye abadlali bethenisi ababika ukuthi sebekhathele ngesenzo senhlanganiso yeTennis Zimbabwe esokukhetha abadlali abaphuma eHarare kuphela, ukuthi badlalele isizwe.
UMthunywa ukhulume loMkhokheli weTennis Zimbabwe uRegis Bhunu othe abadlali abamela isizwe kumncintiswano eminengi bakhethwa ngoba baveze ukuzinikela njalo inhlanganiso yabo iyakhangelisisa ukuthi umdlali munye ngamunye wenze njani kulumdlalo emnyakeni edluleyo.
Uthe ukukhonona kwabadlali labaqeqetshi akumelanga kube khona ngoba uluhlu lokukhethwa kwabadlali luyaziwa.
“Nxa umdlali ezimisele njalo etshengisela ukuthi uyanqoba kumidlalo yakhe, angeke sikhangele eceleni.
Sikhetha labo abenza kuhle kummcintiswano yakuleli laleyo eqhutshwa phetsheya kwelizwe.
“Abadlali abandise ukuthi baphiwe ithuba lokudlalela isizwe yilabo abancintisa bengaphandle kwelizwe. Abadlali laba basezingeni eliphezulu ngenxa yokuthi imncintiswano abakuyo ilandelwa ngabanengi njalo iqhutshwa ngohlonzi. Bakhona abadlali abaphakathi kwelizwe abenza kuhle abake bakhethwa kuthimu. Nxa usenza kuhle uyakhethwa. Kwelakithi sisazama ukufinyelela izinga elifanayo kodwa abadlali labaqeqetshi bengalahli ithemba,” nguBhunu lo.
UBhunu ubike ukuba lonyaka inhlanganiso yabo isihlele ukuqhuba imncintiswano embalwa kukhalenda yabo yemidlalo.
“Sisaxoxisana leziphathamandla zamabhizimusi athile. Siqoqe imidlalo ezadibanisa intshantshu esilazo kuleli. Le yinkuthazo kumathimu, abadlali labaqeqetshi ukuthi balungiselele. Kulesigaba esinzima ukuthi sikhulume amabizo amankampani azasiphathisa ngoba inkulumo azikagqitshwa. Ngokuya kwesikhathi abalandeli bomdlalo bazezwa ukuthi siphetheni kutheni lonyaka.”
Kusenjalo, iTennis Zimbabwe iveze ukuthi iphakathi kokuhlolisisa abadlali abangomama bonke abaphetsheya belenhloso yokubuyisela isizwe kumncintiswano emkhulu owe-Davis Cup lenkezo ebizwa ngokuthi Fed Cup.
“Isizwe seZimbabwe silabadlali abakhonzwa ngumhlaba wonke ngobungcitshi okutsho ukuthi sizimisele ukuncintisa kuzo zonke inkezo eziqoqwa yi-International Tennis Federation. Umbiko esiqhutshela abadlali bonke abasabalale ilizwe yikuthi kukhuthazwe amantombazana ukuthi akhwabithe ithenisi ngoba bayasilela kulumdlalo.
“Sesinanzelele ukuthi sekulabadlali besifazane abanengi abathakazelela umdlalo abaseMelika kodwa lapha balutshwane. Sifuna ukubahlolisisa abadlali laba ukuze bangene kuqembu lesizwe.”
Uthe abadlali abaphetsheya sebelungele ukuncintisa kuthenisi yaphezulu ngoba sebaqeqetsha badlala lumdlalo emakolitshini lamayunivesithi.
Abadlali besifazane abenza udumo kuthenisi babalisa uCara Black, uFadzayi Masiyazi oseqeqetsha eSouthern Illinois University, uVimbayi Mawisire, uTanya Gombera loKerry Langworthy.
