uMthunywa
YiNtatheli kaMthunywa
INKAMPANI yamahlamvu etiye ethandwa ngabanengi iTanganda isilungiselele yaphelela ukuqoqa umjaho wayo obiza abagijimi abedlula inkulungwane ozaqhutshwa edolobheni leMutare ngeSonto.
Kuzagijinywa umango ongamakhilomitha angu-21 kulumncntiswano.
Inkampani yeTanganda Tea ibike ukuba iphosele imali engange-$15 000 kulumjaho njalo ikhangelele ukuthi iqhubekele phambili incedisa isizwe ekuthuthukiseni umdlalo wokugijima kuleli. Inengi labagijimi abaphatheke kuTanganda Tea Half Marathon bandise ukukhethwa kuqembu eligijimela isizwe kuminctiswano ye-International Athletics Association Federation.
Kumbiko othunyelwe iphephandaba likazulu, uTsitsi Kumadiro oyisikhulu seTanganda uthe sekulindwe ukuthi kuyegijinywa.
“Umjaho walonyaka uzaqhutshwa ngeSonto mhlaka 24. Sinxusa wonke umuntu olamandla okugijima.
Inkampani yeTanganda Tea ihlose ukuphakamisa umdlalo wokugijima kuleli ngakho sizahlala sisekela umdlalo lo.”
Abagijima bengapheli umoya kuleli uNkosiyazi Sibanda, Kevin Pangiso, uSamukeliso Moyo, uWirimai Juwao loOlivia Chitate bazabangisana ukuphutsha lumango.
USamkeliso Moyo osewadla ubhedu ngokutshiya abantu uthe uzaphatheka lonyaka njalo.
UKevin Pangiso oweZimbabwe Prison Services ubikele uMthunywa ukuba uzabutha yonke imvuzo.
“Ngilungiselele ukuthi lonyaka ngiyekhonale eMutare. Ngiyawufuna umvuzo wakuqala,” kutsho uPangiso othe ngemva kokugijima umjaho weTanganda Half Marathon uzaphinda ayegijima laseFolosi.
