uMthunywa
Yintatheli kaMthunywa
SEKUVELE ukuba kulequla labafundi eseligangile esikolo seMatopo High okubikwa babhinya abanye abafundi abakumabanga aphansi.
Kubikwa lokhu sokulesikhathi kusenzakala njalo abaphathi besikolo bayakufihla lokhu ngenhloso yokulondoloza ibizo lesikolo.
Ekuqaleni kwayonale inyanga kubikwa kulomfundi okubanga lokuqala owathi ngesikhathi sokutaditsha ntambama wasesiyazikhulula esambuzini, ngokusweleka kwenhlanhla wahlangana lequla lezigangi lezi elahle lambamba andubana abhinywe.
Iphephandaba likazulu lizwe ngomfakazi oqotho ukuba ukubhinywa kwabafundi abancane ngabakhulu sokwenzakale kanengi kuyonale ithemu kodwa akukabi lemizamo esiyenziwe ukuthi kuqedwe.
UMthunywa uxhumane lomfakazi ohlala kule indawo ochaze ukuba abantwana bathwele nzima ngokubhinywa.
“Umntwana lo wayebala ntambama wasuka wagijimela esambuzi, uthe ephuma dibadiba labafana abafunda kulesisikolo kodwa kazange ananzelele ukuthi ngobani bahle bambamba bambhinya qede bamtshiye bahamba. Umfana lo wabikela ababalisi kodwa akuzange kucace ukuthi benzani ngaloludaba,” kutsho umfakazi lo.
Uqhubekele phambili waveza ukuba umntwana lo sengowesibili ebhinywa kodwa akulanto esiyenziwe.
“Mina ngeke ngitsho okunengi kakhulu ngoba angisuye mbalisi njalo angisebenzi labantwana kodwa abafana bahlala bebuya lapha bekhala ngokuthi lasezindlini abahlala kuzo kuyabuya abanye abakhulu bababambe ngamandla ukuthi benze ucansi labo,” kutsho lumfakazi.
Intatheli ixhumane lomphathisikolo uMnu Gardson Sibanda ochaze ukuba usendabeni zokhetho, uzatshaya ucingo.
“Ngisemhlanganweni wokulungiselela ukhetho, ngizakufonela,” kutsho uMnu Sibanda
Imizamo yokukhulumisana loProvincial Education Director weMatabeleland South uMnumzana Lefias Masukume yehlule ngoba incingo zingangeni.
