uMthunywa
ZiNtatheli zikaMthunywa
ISIHLEZI isemlonyeni yabantu endaweni ezitshiyeneyo elizweni inyanga yeChipinge esizakhele udumo okubikwa ilobuciko ekwelapheni kanye lekuhlanzeni imizi ehlutshwa ngondofa ngokwenza imithanithani yayo ibhunyumunyu, uMthunywa uyakuveza lokhu lamhlanje.
Inyanga le, uKhulu uLeon Maguranyanga osebenzela eGwanda esiqintini seMbamba kulezinsuku kubikwa usephathise abantu abanengi kule indawo kanye lakwezinye ezigoqela iSigodini, Bulawayo, Kadoma, Harare kanye lakibo eChipinge.
Ekhuluma lentatheli uMnumzana Leo Dube ohlala eMbamba uveze ukukhathazeka ngendlela inyanga le esebenza ngayo kanye lequla lakhe.
“Lokhe ngathwetshulwa yingwe okunje angikaze ngikubone. Inyanga le ithe ingena emzini lapho ebilande ukuzasebenza khona yahlubula impahla yasala lebhokathi nje kuphela.
“Mina ngikhule ngisazi ukuthi umuntu owenza ulutho enqunu ngumthakathi. Ngokubona kwami abantu laba zinyanga-bathakathi,” kutsho uMnu Dube.
“Okungikhathazayo yikuthi inyanga le labanye bayo bayahlubula basale beze kungakhathalekile ukuthi kulabantu besifazane. Isimanga yikuthi lababantu kabalandaba lokuveza ubunqunu babo emphakathi okungenye into esenza sisole inhloso yabo,” nguDube lowo.
UMthunywa ubuye wakhulumisana lelinye inina elizibize ngokuthi nguMaSibanda othe inyanga lezi zehlisa ezinye inyanga isithunzi.
“Inyanga zazivele zikhona ekadeni kodwa zazingelaphi zinqunu. Abafana laba balande nje ukuzothatha izifuyo zethu. Ukunqunula kwabo bazama nje ukusibhica ngodaka lokuthi bangena bengelalutho bezokhupha abakukhuphayo emizini yethu kodwa bona besazi ukuba benza amasalamusi,” kutsho uMaSibanda.
Intatheli ibuye yakhulumisana loMnumzana Kenneth Sihwa ochaze ukukhathazeka kakhulu ngengcazelo abayipha abantu nxa bebuzwa ukuthi kungani benqunula nxa besiyakhupha impahla yobuthakathi.
“Abantu laba nxa sibabuza ukuthi kungani besebenza benqunu bathi benzela ukuthi sibone ukuba lokho abakukhuphayo kayisibo abayabe bekulethile ngoba bona bengena beze,” kutsho uMnu Sihwa.
Iphephandaba likazulu likhulumisane lomunye wezinyanga lezi uMnumzana John Sibanda osebenza ndawonye loKhulu uMaguranyanga ovumileyo ukuba belapha benqunu.
“Kuliqiniso ukuba nxa sesisebenza siyakhulula impahla zonke sisale lokabhudula kuphela. Ukusebenza sibhunyumunyu senzela ukuthi abantu babone ukuba selapha ngeqiniso njalo lokuthi singena singathwalanga lutho esilufihlileyo,” kutsho uMnu Sibanda.
UMthunywa wenelise njalo ukukhuluma loKhulu uMaguranyanga ecingweni wathi ukusebenza benqunu kwenza abantu babone ukuthi ngabantu abaqotho abangalandanga ukuzaqila abantu njengalokhu okwandise ukwenziwa ngotsikamutanda.
“Nxa siselapha abantu siyahlubula ngempela impahla sisale lamabhokathi. Ungangena emzini womuntu usiyakhupha okuhluphayo ugqokile abantu basuka babone angathi uvele wangena ufihle lezozinto yikho nje sabona kufanele ukuthi sisebenze singagqokanga ukuze sitshengise ubuqotho bethu.
“Thina sehlukene labotsikamutanda, sizinyanga ezibhalise kuZinatha njalo sisebenza okusemthethweni. Banengi esesibancedisile njalo labobantu bayazibuyela bodwa kasibabambi ngamandla abantu ukuthi sibancedise,” kulandisa uKhulu uMaguranyanga ovela esiqintini seNdunge eChipinge.
Wengezelele wathi phakathi kwalabo asebasizile kulenina leSigodini elatshiywa ligciniswe inyoka nguyisezala.
“Inina leli laselidubekile ngabantwabalo ababehlanya umuzi wonke ngenxa yenyoka eyayiyigciniswe nguyisezala engakafi. Inyoka le yayibuya nsuku zonke izokudla ngekhaya ibe isihamba iyelala entabeni kodwa-ke kukhanya wayengasayiphi ukudla yikho nje abantwana basebesangene ingqondo. Umama lo sesamncedisa abantwabakhe bonke sebesilile,” kuphetha uKhulu uMaguranyanga.
