uMthunywa
Yintatheli kaMthunywa
KULANDELA ukuvalwa kwesilindo samabhasi koBulawayo iGodini taxi rank ngenhloso yokwakha indawo yezitolo, i-shopping mall sokuvezwe ukuthi ngaphandle kokwakhiwa kwezitolo lezi kuzafakwa isithombe senkosi uLobhengula.
Inkosi uLobengula Khumalo wayengumntanenkosi uMzilikazi Khumalo yena owaba yinkosi yesibili njalo yokucina yamaNdebele ngemva kokufa kukayise uMzilikazi.
Ekhuluma loMthunywa uMnumzana Thulani Moyo owe Terracota Private Limited okuyibo abaphethe ukwakhiwa kwe-Godini uthe ukufakwa kwesithombe lesi kuyindlela yokukhumbula inkosi yakoBulawayo.
“Kuliqiniso ukuthi sizafaka isithombe seNkosi uLobengula njengendlela yokukhumbula inkosi uLobhengula owayeyinkosi yamaNdebele.
“Esinye njalo isizatho sokuthi sifake lesi isithombe yikuthi indawo le iseduzane lesitalada esibizwa ngokuthi Lobengula Street ngakho sikubona kufanele ukuthi sifake isithombe lesi,” kuchaza uMnu Moyo.
Uphinde wathi: “Manengi amazwe alezithombe zamakhosi abo labakhokheli babo abangasekho emhlabeni ngakho lathi sikubona kufanele ukuthi kubelesithombe lesi koBulawayo okuzenza ukuthi sihlale siyikhumbula inkosi yethu kanye lemisebenzi yayo,” kutsho uMnu Moyo.
UMthunywa uphinde wakhulumisana loMnumzana Nhlanhla Khumalo weMzilikazi kaMthwakazi Cultural Association othe kuyajabulisa ukuthi kuzafakwa isithombe senkosi uLobhengula.
“Kulicebo elihle njalo elijabulisayo ukuthi kuzafakwa isithombe senkosi uLobengula eGodini Mall. Kuhle ngoba kusikhumbuza ngembali lemvelaphi yethu njengamaNdebele ngoba kulezinsuku abatsha abanengi abalalwazi lokuthi badabuka kuphi osokusenza sehluleke ukuqhubekela phambili ngempilo ngoba singazi lapho esivela khona. “UBulawayo ulembali enhle kakhulu ngoba wayeyisigodlo senkosi uLobhengula ngakho isithombe sizasisondeza eduze lembali yethu njengesizwe,” kuphetha uMnu Khumalo.
