uMthunywa
Cornelius Luphahla
KUZATHUNQA uthuli lothudlana esigabeni samaJahunda kumkhosi weGwanda Music Festival lapho okuzabe kudibene khona abaculi abatshiyeneyo.
Umkhosi lo uzakuba khona mhlaka 19 Ncwabakazi njalo uzahlanganisa abaculi abangu-16 eMkhekhelezi Leisure Centre kusukela ngehola lesithupha ntambama kuze kuyelamula ukuphuma kwelanga.
Kumkhosi lo kuzabe kulabaculi bakoBulawayo ababili abagoqela uNkanyiso Guluva 7 kanye loKadder.
UMthunywa ukhulumisane loZibusiso Maphosa omunye wabahleli balo umkhosi wathi bajonge ukuphakamisa ezomculo endaweni yakibo kanye lokuthuthukisa abaculi abasacathula.
“Umkhosi lo ujonge ukuphakamisa ezomculo esabelweni seMatabeleland South njengoba nje besasebalutshwane abaculi kule indawo. Ngalokhu umkhosi lo uzakwenza ukuthi bathuthuke njalo imisebenzi yabo ibonakale kuzulu.
“Okunye njalo injongo yethu yikuphakamisa abaculi abasasungula abadabuka kule indawo. Ngitsho ngoba bengadlala ingoma zabo emphakathi bazakuba lesibindi babuye bafunde kwabanye abaculi ukuthi kumele bacule njani,” kutsho uZibusiso Maphosa.
UGift Lihlohololo Ndlovu odume ngokuthi nguBhadillah kwezomculo uthe umkhosi lo ujonge ukujabulisa uzulu wabuya wakhuthaza uzulu ukuthi aphatheke emkhosini lo.
“Kumkhosi lo sizabe sijabulisa abantu ngengoma zethu ngalokhu ngikhuthaza uzulu ukuthi azozibonela ukudla kwamehlo. Okunye njalo ngikhuthaza abaculi bonke ukuthi baphatheke emkhosini lo ukuze bezojabula lathi.
“Ngibuya njalo ngikhuthaze uzulu ukuthi asekele abaculi bakuleli ukuze bathuthuke engaze waqakathekisa umculo wangaphandle kwelizwe ngoba yikho okwenza owakuleli ungathuthuki,” kutsho uBhadillah.
UGuluva 7 uthe kuyamjabulisa kakhulu ukuba ngomunye wabaculi abazadlala emkhosini lo wathembisa ukujabulisa uzulu ngengoma zakhe.
“Mina ngiyajabula kakhulu ukuba ngomunye wabaculi abazadlala emkhosini weGwanda Music Festival ngoba kuyangithuthukisa kwezomculo. Ngalokhu ngithembisa uzulu ukumjabulisa ngendlela eqotho ngengoma zami,” kutsho uGuluva 7.
