uMthunywa
Nkosilathi Sibanda
UMGADLI weqembu leChicken Inn uEdmore “Spanela” Chirambadare usebike ukuba kuzatsheka ibhetshu kwamanye amathimu mhla ezadibana lethimu yakhe.Umdlali lo ubike ukuthi uzatshibilika ngendlela engakaze ibonakale kumbali yenguqu yePSL. UChirambadare ungene kuthimu yama-Gamecocks evela kuTsholotsho FC.
“Umdlalo wethu kuChicken Inn awufani lowamanye amaqembu. Ngiyaqala ukudlala kuligi enkulu yePSL kodwa sengikhululelike ngoba lapha ngifike ngemukelwa kakuhle. Umlandu engilawo ngowokutshengisa umqeqetshi wami ukuthi ngiyinsika yokuphumelela kwethimu le,” kuveza uChirambadare.
Anduba kuvulwe isizini yalonyaka, bekulamahemuhemu athi umgadli lo uzayehluleka ukudlala kuChicken Inn kodwa yena uqine ngokuthi akasuki kuleliqembu njalo uzasebenzela ukuthola ijezi lakuqala.
Ngokudlala kakuhle akwenzileyo kumdlalo wakhe wakuqala iChicken Inn idlala leFlame Lily, uChirambadare unconywe linengi lababukeli bomdlalo.
Ngesizini edluleyo esadlala ku-Division One, uChirambadare uhlohle amabhola ukwedlula bonke abadlali. Wathola njalo imivuzo eminengi kuqembu leTsholotsho FC kanye lakunhlanganiso yeZimbabwe Football Association kumhlubulo ongezansi yelizwe.
Umdlali lo uthe njengoba esekuligi yePSL, uzayengeza amabhola awahlohla esasekuligi encane.
“Sesikhuluma ngePSL la. Ngifuna ukuhlohla amabhola amanengi kulalawo engawangenisa ngiku-Division One.
“Abanye abadlali basuka bazitshele nxa sebekhethwe kumathimu amakhulu, kodwa mina ngizaqhubeka ngisebenza nzima njalo ngilandela izeluleko zabaqeqetshi,” kubika uChirambadare.
Uthe ubonga kakhulu umqeqetshi weChicken Inn uJoey Antipas okunguye omkhuthaza njalonje, okumenza azethembe ukuthi ngelinye ilanga uzagqoka ijesi lethimu yesizwe amaWarriors.
