uMthunywa
Nkosilathi Sibanda eseBinga
UKUHLALA emaphandleni akutsho ukuba umntwana wesikolo angeke afeze amaphupho akhe. Lokhu kugcwaliseke ngabadlali bezikolo zeSomvubu Secondary leseSimbo High abazamela iMatabeleland North kunkezo yeCopa Coca-Cola.
Isikolo seSimbo High esiseNkayi sinqobe kuqula lamankazana kuthi iSomvubu etholakala esigabeni seNyathi yona izalwela inkezo kubafana. Inkezo yeCopa Coca-Cola idlalelwa ngabafundi abaleminyaka yokuzalwa engaphansi kwetshumi lanhlanu.
Isigaba seNkayi saziwa ngokuthi kuko “mnyama ubambile” ngenxa yokuthi sisemuva kwezengqubekela phambili okwenza ukuthi kungabi lento eyodwa ebatshazwa ngalindawo. Okwenziwe ngabadlali beSimbo High kuvule amehlo kunengi ebelisithi “komnyama ubambile” akulathalenta.
Bekungelula ukuthi izikolo lezi zifinyelele lelibanga lomncintiswano, nanko phela bezidibene lamaqembu aziwa ezintshantshu zebhola lenyawo eMat North. Ukunqoba kwazo kumangalisile ngoba zidlule phezulu kweHwange High, iMabhikwa, iTohwe, iSt James’, iBinga High leNembe eyeTsholotsho.
Phose bonke abantwana bamaqembu womabili badlale bengela zicathulo zokukhaba ibhola. Kodwa batshengise ukuba ukuswela akusoze kwenqabele ukuthi bamele isabelo seMat North kumncintiswano weCopa Coca-Cola.
Umqeqetshi weSimbo High uFungai Manyangarirwa uthe ukufinyelela kumdlalo we-final kube yikuzimisela njalo sifuna ukuba yisikolo sokuqala ukuletha inkezo yodumo le eMat North.
“Siqale ukulungiselela umncintiswano lo ngoZibandlela. Ukufika kwethu la kungumusa kaNkulunkulu lokusebenza gadalala. Siphuma eNkayi, okwaziwa ngokuthi kukomnyama ubambile kodwa sitshele abadlali ukuthi bengazikhangeleli phansi ngenxa yokuthi bavela endaweni engalampucuko. Abadlali bangene enkundleni belokuzethemba yikho benqobile,” kutsho uManyangarirwa.
Ukufikisa ibanga laphezulu, abadlali beSimbo High banqobe iMabhikwa 3-2 kumbekwa. Amathimu ebeqede umdlalo engutshiki lobhanqa eku 1-1.
Kwehlule ukuthi abafana balesi isikolo baqhubekele phambili ngemva kokubhuqwa 3-1 yisikolo seSomvubu.
Lakuleliqula labafana besikolo seSimbo High bebechinsa ukufika ku-final, okuyisibonelo sokuthi umqeqetshi labaphathi balesi isikolo basebenze gadalala ukuthi abantwana banqobe.
“Siqhubekela phambili sisazi ukuba silande ukuyanqoba. Amalungiselelo ethu awasoke aphelele lapha ngoba sesinqobile, sihlezi sikwazi ukuthi inkezo yeCopa Coca-Cola idlalelwa zingcitshi kodwa nanti ithuba libuya, sizosebenza,” nguManyangarirwa lo.
EzeNyathi lazo zithabe zimanzi te. Umphathisikolo weSomvubu Secondary uAffection Siphali uthe bazizwa besezulwini.
Isikolo seSomvubu asiqalisi ukufikisa ama-final aweCopa Coca-Cola.
“Lokhu kubizwa kuthiwa yikwenza izimanga. Abantwabethu benze kahle. Beligcwele ithalenta kulumncintiswano njalo sifunde okunengi lokhe saqalisa ukuncintisa kuwo. Mina njengomphathisikolo ngizabona ukuthi abaqeqetshi labadlali banikezwe lonke usekelo abangalufuna ukuze nxa sisiyafika emdlalweni yokucina, kubelula ukunqoba,” kutsho uSiphali.
Isikolo seBinga lesi sibambisana umango lezeMpopoma High yakoBulawayo ehwatshe amaqembu abafana lamankazana. Esabelweni seMat South kuzancintisa iThekwane High leMtshabezi.
IMtshabezi iyachinsa inkudla zeCopa Coca-Cola.
Umsekeli kaMgcinisihlalo weNational Secondary Heads (Nash) esabelweni seMat North uPekelelo Mathe ubikele iphephandaba likazulu ukuthi isibongo sabo esikhulu siya kuCopa Coca- Cola.
“Siyaziqhenya ngokusebenzelana lenkezo yeCopa Coca-Cola ngoba ithalenta labantwabethu kunguqu liyaphakama.”
Uluhlu lwezikolo ezizancintisa eZvishavane ngempelaviki ezayo:
Amankazana: Mpopoma High (Bulawayo), Simbo High (Mat North),Thekwane High ( Mat South), Chamakwanda Sec (Midlands), Birivenge School ( Masvingo), Vainona (Harare), Gweshe School (Mashonaland Central), Chenhuta Sec ( Mash East), Nyamaruru school ( Manicaland), Mwami Sec (Mash West), Zvishavane High (abanikazi benkundla), Chidyamakono (ababambe inkezo).
Abafana: Mpopoma High (Bulawayo), Somvubu Sec (Mat North), Mtshabezi High (Mat South), Guinea Fowl (Midlands), Pamushana High (Masvingo), Prince Edward (Harare), Kanyemba school (Mash Central), Waddilove High (Mash East), Mutare Boys High (Manicaland), Pfupajena school (Mash West). Mandava High (abanikazi benkundla), Rusununguko High (ababambe inkezo).
