uMthunywa
Mthokozisi Dube
UGATSHA lweNational Employment Services lusebenzelana logatsha lwezemfundo selusungule uhlelo lokufundisa abafundi ngokufunakalayo ukuze umuntu enze umsebenzi othile ukuze enelise ukufundela imisebenzi awufisayo.
Umkhankaso lo okhangelelwe ukusabalaliswa kuzwe lonke jikelele okwamanje uzaqhutshwa kanye ngomnyaka lapho ugatsha lolu oluzanxusa abasebenza imisebenzi etshiyeneyo ngenjongo yokuzofundisa abatsha ngokudingakala ukuze benze imisebenzi etshiyeneyo.
Okhangele loluhlelo uMnumzana Madzianise Graham ubike ukuba inani labadinga imisebenzi eliphezulu yilo elifuqe uHulumende ukuba aqhube umkhankaso lo ukwenzela ukuthi abatsha bangafundeli imisebenzi abangathandiyo.
“Siqhuba uhlelo lolu ezikolo ezitshiyeneyo, lapho esifundisa abafundi ngemisebenzi ethile njalo sincedise labaqede isikolo ukuba bakhethe ukufundela imisebenzi abayifunayo hatshi ukuthi bafundele imisebenzi ngoba kuyiyo esisele ngoba kuzabaphambanisa impilo yabo yonke,” kubika uMnu Madzianike.
UMnu Madzianike ubike ukuba baqoqa imihlangano ezikolo lapho abazahlanganisa abafundi ngezabelo kube lezikhulumi ezenza imisebenzi etshiyeneyo okuzenza abafundi bazibonele ukuthi ubuhle bomsebenzi lo yilobu, ububi yilobu ngoba bezizwela kuzikhulumi ezitshiyeneyo.
“Emihlanganweni yethu le sikhetha abantu abenza imisebenzi etshiyeneyo ukuze bachazele abafundi kabanzi ngemisebenzi yabo ukuthi bakhule besazi ukuthi bafisa ukwenza umsebenzi bani,” kubika uMnu Madzianise.
Wengezelele wathi kuloluhlelo kabahlosanga kuphela ukufundisa abafundi kodwa bahlose ukufinyelela njalo asebaqeda isikolo lapho abenza okuthiwa yi-Career Talk lapho abaxoxisana khona labadinga imisebenzi ngokudingwa yimisebenzi ethile.
“Sizama ukuthi ama-school leaver abe lombono, akhethe imisebenzi ayifisayo hatshi ukwenza umsebenzi ngoba kuyiwo osuvukile.
“Asifuni ukuthi umuntu esefundele umsebenzi azisole athi ngafundela umsebenzi engingawuthandiyo,” kubika uMnu Madzianise.
UMnu Madzianise ubike njalo ukuba balohlelo olubizwa ngokuthi yi-Implant Exposure lapho abakhetha abafundi abaqede izifundo zika Fomu 4 kumbe Fomu 6 babahambise emankampanini amakhulu ukuba bayezibonela ukuthi ama-technicians enza njani umsebenzi wawo.
Lokhu kubapha njalo ithuba lokuthi babuze imibuzo okuzabenza bakhwabithe imisebenzi abayibonayo,” kugcizelela uMnu Madzianise.
“Silesifiso sokuthi uhlelo lolu lungabi ngolwenziwa kanye ngomnyaka kodwa ukusilela kwemali zokuthwala abantu abachazela abafundi ngemisebenzi kanye lokudla kwabo kusasitshayisa ngamakhanda,” kubika uMnu Madzianise.
Uphethe ngokuthi khathesi bakhangele isabelo seMatabeleland North sona esileziqinti ezibalisa iTsholotsho, Lupane, Nkayi, Hwange, Binga kanye leMguza leBulawayo.
Kubikwa emihlanganweni abayenzayo baxhaswa ngabogatsha lwabatsha kanye lolwe-Small to Medium Enterprise bona abandulela njalo abatsha ukuthi amabhizimusi akhokhelwa njani.
Umqondiso wezemfundo esabelweni sakoBulawayo uMnumzana Dan Moyo uncome kabanzi lesisenzo ngoba esithi ulethemba lokuthi sizaphathisa abafundi.
“Inengi labafundi liyehluleka ukukhetha imisebenzi eliyifisayo kungakho ukuba khona kwezikhulumi ezehlukeneyo kuzabancedisa,” kuphetha uMnu Moyo.
