uMthunywa
YiNtatheli kaMthunywa
ABANTU bakuleli izolo bebethe gwaqa enkundleni ezehlukeneyo elizweni lonke kusikhumbuzo sabantu abakhulula ilizwe embusweni wamakhiwa.
Ukuze ilizwe lithole inkululeko kanye lozibuse kulamanina kanye lamadoda aqunga izibindi bakhombana labahlukulizi ngokulwa impi bakhulula sonke ekugqilazweni.
Ilizwe balikhulula balisusa ukuba yiRhodesia laba yiZimbabwe esisaziwa lamhlanje.
Ngemva kwempi yombangazwe lapho okwachitheka igazi ilizwe lathola uzibuse mhlaka 18 Mabasa 1980, ilanga ebesilijabulela izolo.
Njengesiko, ilangabi likazibuse lilumathisiwe limele inkululeko eyalethwa yikuchitheka kwegazi ngesikhathi kulwelwa uzibuse.
Ifulegi yelizwe iqukethe imibala eyisikhombisa egoqela oluhlaza, olithanga, obomvu, omnyama kube le-triangle emhlophe okulenkanyezi ezilenhlangothi ezinhlanu lenyoni yelizwe ihlezi phezulu.
Isimo sefulegi yeZimbabwe saqala ukusetshenziswa mhlaka 18 Mabasa 1980, ilanga lapho iZimbabwe eyathola khona uzibuse kwabelungu.
Umbala oluhlaza efulegini umele izilimo kanye lezihlahla ezigcwele elizweni, umbala olithanga umele umnotho osematsheni aligugu angaphansi komhlabathi, obomvu umele igazi elachitheka ngesikhathi sempi kuthi omnyama umele abantu abansundu abahlala eZimbabwe.
Inyoni ekufulegi yilo uphawu olumele ilizwe lonke jikelele kuthi i-triangle emhlophe yona imele ukuthula.
Ngemva kweminyaka engu-38 iZimbabwe ithole uzibuse abantu beZimbabwe lokhu besaziqhenya ngozibuse wabo.
Ilanga likazibuse lisipha amathuba okukhangela imvelaphi yethu lokuphumelela esesilakho, siphinde sikhangele uhlupho esikhangelane lalo njengelizwe.
Izizalwane zakuleli akumelanga zikhohlwe ukuqakatheka kwelanga likazibuse ngoba asesekhona amazwe asentshonalanga alokhu efisa ukuhluthuna ilizwe leli balibuse lamanye amazwe ase-Africa njengakudala.
Ilanga layizolo lilanga lapho abamabandla ombangazwe ehlukeneyo okumele babeke eceleni ukwehlukana kwabo babambane njengabantu banye.
Ilanga likazibuse lipha abantu igunya lokufeza izifiso zabo ngekusasa lelizwe lethu ngoba izikhathi zokuncindezelwa sezadlula. Lithuba njalo lokuxazulula inkinga zethu kungela kungenela kwamazwe aphandle.
Singakatholi uzibuse umhlabathi wawusezandleni zabelungu utshiya abantu abansundu belomhlabathi ongalimekiyo bona besebenzisa umhlabathi ovundileyo. Uhlelo lweZimbabwe olwalukhokhelwa ngowayengumongameli uRobert Mugabe lokuthatha umhlabathi olwaqala ngomnyaka ka2000 lwatshiya abantu abansundu belomhlabathi ovundileyo.
IZimbabwe izibambile kwezokulima ngoba umnyaka ngomnyaka kulinywa izilimo ezilenzuzo elohlonzi oluphezulu, eziletha imali yaphandle kwelizwe kanye lezifuyo.
Ukugcina inkomo ngeyinye indlela ekhokhelayo ekuvuseleleni umkhonomi welizwe.
Ngakho-ke asihlaleni sikhumbula lapho esivela khona sikhangela ubuhle lobunzima esihlangane labo eminyakeni engu-38 sizibusa.
