Isigqi somdladla…Isidwabu setshumi lasithupha: Umlindi wenyoka ekamelweni

14 Jun, 2018 - 00:06 0 Views

uMthunywa

Trevor, Mhlanga

Nxa vele ungela ziko lomangoye kalandawo yokulala ngakho kusuke kube nzima ukuba wazi ukuba ulohlupho bani. Ubona kuphela izinto zisenzakala usale uzincweba uzibuza ukuba ingabe ubone kuhle kumbe liphupho? Ubunsumansumane abupheleli kunganekwane zabogogo, kuwe bubonakala buhamba ngezikaAdamu emini lithe ntse!

Ungalindele uyahlangana lendaba ebaba gamu okwesihaqa esifakwe ibilebile uze uphambane, kukanti vele uhlupho ayisilo lolu olubonayo, kukhona okukhulu kulalokhu. Ungaphaphatheki ugcwale iganga lonke usiyadinga izikhonkwane zokukuvikela kokuloyayo, umlindi wenyoka usekamelweni lakho.

Ngaleyo nyanga uthole itikiti lokugada indizamtshina impilo yakho iyaguquka, uyaqala ukudinga impahla ozazigqoka nxa usundiza emkhathini.

Ulungise lesikhwama esihle esikunika isithunzi phakathi kwabanye abantu, uze udinge lamakha aloqhatshi ungakhathali ngentengo yawo ephakemeyo. Konke lokhu ukwenzela ukugada indizamtshina usiya kude.

Ukuqakathekiswa kwalolu hambo akufani lezinye ihambo oyake uzithathe, awuthwali ngitsho lelilodwa lamawaka amasaka owande ukuwathwala nxa usuka ekhaya usiza edolobheni, uthwala impahla ezihloliweyo lamafutha okugcoba atshwaphulula ijwabu. Kuthi lendlela onyathela ngayo mzwalokho usiya gada iba sengathi uyesaba ukuthi uzangcola ucine ungasamkelekanga kundizamtshina.

Intengo yetikiti lendizamtshina iphezulu okokuthi kalithengwa nguwonkana muntu obophela imali eqheleni.

Yizo lezi zinto ezifika emkhumbulweni wakho nxa usuphakathi, bese uzibona ungumuntu osefinyelele kwelinye izinga abanengi abangeke balihotsha.

Ukulungiselela okuletha inguquko empilweni yakho, kumele kube ngutshiki lobhanqa lokulungiselela ukugada indiza. Abantu abafinyelela eziqongweni eziphakemeyo ngabazwisisa intengo yetikiti lempilo lokuthi leyontengo igabhela eyendizamtshina ngokwayo. Nxa kungadingwa isilinganiso lapha emhlabeni singetholokale esingafakwa sibe lesisindo esilingana lesempilo.

Okwenza wena wekethekise kangaka yikuthi awukananzeleli kumbe vele kawazi ukuba uyangaphi. Impahla ozigqokayo eziyizo eziveza isimilo zitshengisa ukuba ungumuntu onjani njalo ozaphelela ngaphi kuhambo lwempilo, nxa ugqoka okuyangisayo ebantwini abahloniphekayo esigabeni kutsho ukuthi ngeke waba yingxenye yabo ngaphandle kokuba unqume ukuntshintsha izembatho zakho.

Ngezake uthi umanithinithi, ngapha umadabudabu agcwele imjulujulu wamkeleke kundizamtshina lanxa ulithwele itikiti lakhona. Kabakuzwa lanxa ungazama ukuchasisa okukwenza ube ngaleyo ndlela, vele kabalasikhathi lawe, uphoselwa phandle kwendlu yokulindela indizamtshina yiziqhwaga zamadoda zingagqize qhakala.

Kumele ukhangeleke njengomuntu owaziyo uhlobo lwendlela ohamba ngayo, hatshi ukwenza okungacaciyo.

Lokhu kuveza ukuthi isimilo sakho kumele usilungisise ukuze sifanele isihlothi ozakuma kuso ngenxa yendlela othethe ngayo uhambo lwempilo.

Akusicala ukuba kawuphathwanga kuhle usakhula kumbe awufundiswanga ngendlela efaneleyo, umphakathi lezinga lapho oyakhona akunaki lapho ovela khona kodwa kuyabe kukhangelelwe ukuba ube yilokho okumele ube yikho khona ngenxa yokuthi suqakamile empilweni. Ngalokhu qala lamuhla ukuziguqula ukuze wamukeleke njalo ufinyelele kulelo zinga eliphezulu.

Qaphelisa lokhu, ukuguqula isimilo sakho kuqala ngaphakathi besekubonakala phandle, njengoba nje ungezake ugqoke impahla yangaphakathi edabukileyo kundizamtshina lanxa kungelamuntu ozayibona, ngakho kumele ulungisise okungabonwa muntu kuqala besekugabhela kokubonakalayo kusimilo sakho.

Ukulungisisa impahla kungenziwa ngokuthenga ezintsha okutsho ukuqala ukwenza imisebenzi emihle oyibone kwabanye besekusiba yisimilo esitsha kuwe. Okunye ongakwenza yikuwatsha lokwelula impahla olazo okutsho ukuzinuka amakhwapha, uzibophe ukhalo, uqondise amagobo kusimilo sakho. Okunye okuqakathekileyo kodwa okungalula yikulahla impahla ongasazidingiyo.

Lokhu kuba ngameva ezihlalweni ngoba ziyabe zilokhu zithandeka lezo mpahla lanxa sezingasafanelanga.

Lokhu kutsho ukutshiya lezo zenzo ezikujabulisayo kodwa zingakhi isimilo sakho, lanxa kunzima kumele ukwenze lokho ngoba kuyilo inyathelo lakuqala ekuvaleni umlindi wenyoka osekamelweni lakho. Thola amanye amanyathelo kuzidwabu ezilandelayo zalesi Sigqi Somdladla.

l Thintana loTrevor Mhlanga kunombolo zikamakhal’ ekhukhwini ezithi: +263775523605.
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds