uMthunywa
Trevor Mhlanga
Wazi ngani ukuba sufinyelele esiqongweni sokuphumelela? Nxa ukuphumelela bekungaba lentengo bekungathengwa ngani? Le yimibuzo okumele isengelwe kuwonkana umuntu ocabanga ukuqala kumbe ophakathi kokwenza okuthile ukuze aphumelele.
Isaka lihle kakhulu, lisetshenziswa kokunengi; lithwala okuhlanzekileyo lokungcolileyo, okudliwayo lokulahliweyo kodwa ngeke walisebenzisa ukukhel’ amanzi lanxa lilitsha lingela las’khal’ esisodwa.
Kuthi nxa selisetshenziswe okwesikhath’ eside liyaqala ukuguga lokudabuka licine selithelwa eziko. Ngaze lisebenze okunganani kalikhathalelwa, kalizwelwa buhlungu nxa selitshiswa ngoba lingela mpilo.
Impunga nxa sezingasadlanga nkotshane ngesiga thize esenziwa ngokungozozo kwabazukulu okungenelisi kwenza njengoba kutshelwa zizwakala ngokuthi, “Saka liyatsha!”
Kulokuny’ okungabantwana okuphila samagol’ angathambisekiyo, laph’ okukhona konakal’ eyiny’ into kuphela. Ngenxa yamanyal’ anjalo abalezimv’ ekhanda, lanx’ amandla sewathutha, imilom’ ayigcwalelwa mfula; bakhuluma lize libanjwe ngumqando liyegqok’ ijesi.
Khona nxa kunje inkulumo iba sengazathi yisilond’ esibhibhidlayo, nxa okungokhekhe kulezimil’ ezingaphoziswanga.
Abadala bayabe bekhalel’ indlela ubuntu osebukhukhuzwe ngamagenga ngayo, lobuphofu osebufikele ikusasa ngenxa yabantwana abangalayekanga, abangelanhlonipho. Lanxa sebekhulile abantwana labo, baba yizigila mkhuba, abaphila ngenkohlakalo labangathembekanga. Sixhwali ndini! Kungani uzenza onina lezi zenzo ezinxele lawe uphila ngazo? Saka liyatsha!
Usuz’ ungaka ukhul’ ungumtshina wokugay’ amanga. Ngitsho wena, futhi kangixolisi! Okukubulalayo yikuthi kawuthembekanga. Uthi nxa uthengisa amabele, uwathe qith’ emgqonyeni, kube ngosikiweyo ukuze kukhanye sengazathi ugcwele wona ungagcwalanga.
Nxa kuyimbambayila ihlaliswe ngendlela ebonisa sengazath’ is’qhuma sigcwele, kungumoya wodwa.
Uyayigig’ imali ngobugwelegwele, uz’ ubelesis’ esingangekhabe.
Asibunandi bemal’ engehliselwanga zithukuthuku, itholwa ngesiphangiphangi njengomthambiso wes’dakwa, ichithwe samanz’ athelel’ engadini kube sengathi yinyon’ esind’ ekubanjweni yinofi. Ngaz’ uyithol’ ingamawakawaka, wakhe ngay’ is’godlo, ikulethel’ udumo kayikuphi kuthula futhi umphefumulo wakho uyazaca.
Nxa okwenzayo kukulethela inzuzo sengazathi ngumqando uletha umvimbano kuhle impela lokho, kodwa nxa kungokuhina umoya wakho kutshiye. Inengi lith’ impumelelo itsho ukubuthelela inzuzo, udumo, lamandla. Akunjalo!
Inzuzo etholwe ngendlela emazombezombe, ifana lokudla okuphakelwe egabheni losane lokuyela ngaphandle. Ngaze kuchichime, kubukeke, kugxozis’ indenda, akudleki, lozibamba ngamandla ukukudla uphanga akhiphe asale segaqa ngenxa yendlala.
Kuqakathekile-ke ukuthi loba yini oyenzayo ibe ngethokozisa ingaphakathi kuqala ukuze impumela yakho ihlabuseke kuwe.
Izenzo ezingahlambulukanga zisobala, lawe kawuthandi ukuba zenziwe kuwe, ngakho ungazenzi kwabanye.
Ubuqili bakho bungakhohlisa laba ohuquluza inzuzo yabo bengazi ukuthi banindw’ udak’ emehlweni, kodwa umzwangedwa uyakugongoda kuphela. Ungabona kungasatshayi wazi ukuba sudlulile, saka liyatsha!
Thintana loTrevor Mhlanga kunombolo zikamakhal’ ekhukhwini ezithi: +263775523605 Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
