uMthunywa
Trevor Mhlanga
AKUVAMANGA ukuzwa kuthiwa uSibanibanyana obefundela ukutshayela uwele engozini yemota.
Isizatho yikuthi umtshayeli osafundela wande ukulandela yonke imithetho yomgwaqo leyokutshayela ngoba edinga isithupha semvumo yokuyitshova imota eyedwa.
Abatshayeli bamakhombi kabanjalo, yibo abaleziga zokudlula bevalelwe emahlanganweni ezindlela bengananzi izibani ezibaneka okubomvu. Abanye uhle ubone nge ngudu yotshwala ukuthi vele konakele.
Lanxa kunjalo abantu kabagadi imota yomuntu osafundela, bagada wona amakhombi ngoba kungavumi ukuba atshayelwe ngumuntu ongela lwazi lenkambo ekutshayeleni.
Igunya balithatha lapho laba batshayeli abephula imithetho yemigwaqo bekhohlwa ukuba akuqili lazikhotha emhlane.
Nxa usaqala umsebenzi wenza ngesineke konke okwenzayo, uthembeke esikhathini lasekugcwaliseni lokhu omiselwe ukukwenza ngobunono obukhulu.
Iminyaka ingedlula emibili ubusuqala ukukhudumala, ukuzibona suhlezi pekle bese uqala ukuyekethisa umsebenzi wakho.
Manje mhlawumbe kawusadingi kulandela izimiso ezifakiweyo susebenzisa ulwazi lenkambo, kungasela lutho ongalufundiswa olutsha.
Amaphutha yikho lapho aqala khona, vele impethu ingena ngenxeba kucine kusonakala yonkana into.
Umkhuba wokuthi nxa ulento okumele uyenze uqale uyibekele isikhathi esizayo ngoba ubona sengazathi isikhathi sisese sinengi; into yakho yokungananzi ukudinga umbono wabanye ngoba usithi ungephambanise lutho; leya ngqondo yokuzithemba okwedlulisa amalawulo uze uzingenise engozini.
Yikho kanye lokhu okukutshontsela isithunzi kancane kancane njengegundwane eliluma liphozisa.
Ngiya ngibone umalukazana nxa esanda kufika kwabozala indlela aziphatha ngayo, isizotha alaso siyamangalisa.
Uba yingilosi umntanenkosi, alunge ukwedlula umangoye womlungu, akhulume ngezwi elipholileyo aze alengise ikhanda.
Nxa sokulezinyanga ezimbalwa ibhatshi lokuzehlisa liyasuswa, aqale ukuqholozela lenkulumo engabhabhathizwanga.
Mina lawe sinjalo, siyalibala ukuba impilo ibanzi kulokubona kwamehlo ethu.
Izizatho ezibambekayo lezingabambekiyo ziyaqala ukuba khona ngomsebenzi ongenziwanga ngesikhathi.
Iqiniso lokufeketha kukhulunywe ngalokhuya okungalungisiswanga ngendlela. Isikhathi kasisabanjwa, sokuhlala kulokuvukayo okusiphazamisa ekwenzeni izinto ngokupheleleyo.
Imbangela yalokhu yikulibala ukuthi la esikhona manje kwakulabanye abantu, okutsho ukuthi bakhona abanye njalo abangasala bengena endaweni yethu sesisusiwe.
Kuqaphelise lokhu, mina sengikunanzelele lami.
Nxa kuyikusebenza gadalala okukwenze wafika ezingeni osukulo kuhle kakhulu lokhu. Ngakho-ke, akusi kuhlala phansi kodwa yikuqhubeka usenza kuhle okuzakugcina kubuye kukuphakamisele phezulu ngamandla.
Ungakhohlwa ukuba uvuna okuhlanyeleyo, lanxa suke wagcwalisa iziphala ezilikhulu, ukuhlanyela okuyingcosana kuzakukwenza wehluleke ukugcwalisa lesisodwa kwelizayo.
Hlakanipha njengentethe ehlala intshompoka ukuze izilondoloze njalo ithole okuya ethunjini. Nxa kulento okumele uyenze, yenza ngemfanelo, ngobunono, ngobungcitshi, langesikhathi, ungazenzi izaba!
-Thintana loTrevor Mhlanga kunombolo zikamakhal’ ekhukhwini ezithi: +263775523605
kumbekumakheliomqhafazo la: [email protected]; Facebook: Trevor Mhlanga; Twitter: @MhlangaTrev
