Isigqi somdladla: Isidwabu 37: Ukwesaba okuhle

15 Nov, 2018 - 00:11 0 Views
Isigqi somdladla: Isidwabu 37: Ukwesaba okuhle

uMthunywa

Trevor Mhlanga

Inyawo ntsi, amadolo yangayanga, amahlombe gedegede, inhliziyo mpo, lesisu khutshukhutshu. Intamo sokuzimpophoma zamanzi, ulimi nama ensinini, lamehlo bhodiyani engani lunwabu luhahabela izibungu.
Singakufikela lesi simo uphenduka isithutha, isimungulu lesacuthe ngasikhathi sinye; amandla ayavalelisa lengqondo ivakatshe.

Yisimo esingamnandanga esibizwa yikwesaba.

Owesabayo uyisibotshwa salokhu akwesabayo: usebenza gadalala ngoba wesaba ukuxotshwa; uchitha izigidi etotoza isithandwa sakhe ngoba wesaba ukwaliwa; ukhuluma ngonanzelelo ngoba wesaba ukutshaywa; ulima ndawana zonke ngoba wesaba indlala; kunengi-ke abantu asebezingenise kukho, okunye okungekhulumeke befuqwa yikwesaba.

Abanye babonakala sebezigxamuze enkingeni ngalokhu abakwenze besesaba besebeng’khona bebona ukuthi bekungumnyama ongela mpisi.

Kwasekwenze njani kuze kuthiwe kwabo kwagwala akula sililo? Abadala basebebone amadoda alezibindi, emela umsindo elinyazwa njalo esifa ngokuzenza bona bona.

Ubuqhawe bungasasizi umuntu seye kogoqanyawo ngenxa yokuqunga isibindi angene igusu elimnyama, kanti mzwanokho lilempisi eziphangayo eziyaqeda ngaye.

Amagwala esikolo abonakala ngokuphanga aqede umsebenzi abawuphiwe ngabaqeqetshi, lokhu kuzala ukuba baphange ukubamba abakufundiswayo besebesiba zingcitshi kulokhu abakufundayo.

Nanku ukwesaba okuhle; ukwesaba ukuphambanisa, ukuphambuka, lokuphambana kokulungileyo.

Ukuzidla ngombuzo . . . “Kambe kungathiwani nxa sekuzwakala kuthiwa ngenze isinengiso esinje?” Usazi ukuthi vele inala kayidumi kuduma indlala.

Ekukhangeleni umumo welizwe ongaginyekiyo njengentanga yeganu kuvela mgceke ukuba abantwana, ikakhulu intandane labantwana ababuthakathaka (orphans and vulnerable children) basele egcekeni bengela themba.

Ngokwesaba ukuba ikusasa lethu limi njani nxa abantwabethu bekhala bengatshaywanga inhlanganiso ezibiza ngeOrphans and Vulnerable Children Oasis and Verification Centre (OVCsOVC) isihlenge lensika yentandane labantwana abababuthakathaka yazimisela ukuwuthwala lowo mthwalo.

Injongo yalinhlanganiso yikufinyelelisa impucuko (technology) ebantwaneni, ikakhulu abasezingeni elingaphansi lemfundo ukuze bakhule lakho njengoba ikhula lamanono ayo. Ubugwala bubonakala ngezenzo, kumele ukwesaba kukuphaphamise kukwenze uthathe inyathelo thize ngempilo yakho.

NgoLwesibili mhla zingamatshumi amabili kuyonale inyanga kaLwezi (20 November) inhlanganiso i-OVCsOVC izaba lomcimbi wokuwuhloma njengesikhali sika haso zhii mthakathi! Kulwiwa lemigulumbana lemigoqo enqabela intandane labantwana ababuthakathaka ukuthola impucuko.

Kulumcimbi uzulu uyanxuswa ukuba abe yingxenye yalumzamo wokuguqula ikusasa lamuhla.

Lapha-ke kudingwa amagwala awesaba ukuba ikusasa ingaphambaniseka nxa singatshaya indiva inhlupho zabantwana ababhekane lazo manje.

Qaphela ukwesaba kwakho kungabi ngokuvimba ingqubekela phambili, kakube ngokukukhathazayo, njengomuntu ophathekileyo edinga indlu yokuzikhulula, yiba ngumuntu ongahlalisekiyo ungenzanga okuthize okuhle.

Yiba lokwesaba okuhle!

Okunengi ngeOVCsOVC ukuthola kumqhafazo encwadini yobuso (Facebook) kukhasi: OVCsOVC
Thintana loTrevor Mhlanga kunombolo zika makhal’ ekhukhwini ezithi: +263775523605
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds