uMthunywa
Trevor Mhlanga
“Izalukazi zidingan’ emadolobheni, kungani zingayi ekhaya ziyeloya?” NguPhephile lo okhwaza ngenhliziyo eyophayo, kade wanyonkolozwa, wahaladwa yingwevukazi yangakibo.
Esesemncane esabunjelwa isitshwala wayengakuboni lokhu. Ukusingathwa yizandla zika Masgogo kwakuqeda konke ukwesaba. Wayeyimvu umntanomuntu, ugogo kuye ekhwabitheka kulenyama yenkukhu, kuthi lanxa abazali befikile ngekhaya kulikhefu loba kwesinye isikhathi nje, zaziwohloka ezengane ngokuthi sitha kukagogo. Mhlawumbe ebona sengazathi bazasala bemhluthuna, baye laye eGoli khonale, abahlala becatshe khona angabe esambona ugogo. Ikhanda lalikhona kulintombi, ngaz’ umbone engathi yisidwedwe enje, izembatho ezimnyama kusukela ekhanda kusehla zemfunda yaphezulu, laye seke wazigqoka.
Ukhuluma esenzenje simkhangele ngokudangala sididwa yinto eyodwa zwi; “kathi umntwana lo usweleni aze agqoke umpampanana webhulugwe elizimvemve kanje?”
Amazwi kaPhephile yinsimbi encencethayo kugogo, indlebe sezibuthundu, lamehlo sefiphele, kodwa lokhu okunje kungamadol’ embuzi kugogo. “Hawu gogo! Awungizwa?” Amehlo segobhoza inyembezi.
Zimvakatshele insuku zayizolo, izandla zesalukazi lesi esesiqhaqhazela ngedumbe zazimbambile emigwaqweni zimvikel’ engozini zemota.
Ilizwi elalimkhuza nxa sokumphunyaka liyezwakala: “Mzukulu bambisisa lokhu, kuhle ukuba ufunde njengoba ukukhuthalele kanje, kodwa imfundo eyinqaba kulayo yonke imfundo yikwazi ukuhlonipha, ukuzihlonipha wena kuqala!” Wayengazi umutsho wala mazwi, kodwa njengoba ikhula lamanono ayo, wondliwa yiwo, wadla wona waze waya kumfunda yaphezulu esigodlweni eHalale. Dukuduku iminyaka emitshumi seyedlule, nanguke uPhephile ulokh’ ephilile, kwazise lengwevukazi yangakwabo isatotoba.
Ubudlelwano buka Phephile loMas’gogo yinhlanyelo eyenza abe yilokhu ayikho khona manje. Eqeda nje kwamukela izithupha waqhatshwa, emnyakeni engangaki wavula okuyisikotokotwana kwakhe osekuyinkalakatha yebhizimusi namhlanje. Ijwabu liyakuvezela ukuba ukhomba ngophakathi lempahla yakhe ngeyachapha ulwandle.
Ukhuluma ngalindlela izandla zichayiwe lamazinyo abalekela umlomo. Yinkulumo yothando, esomisana lesalukazi esamondlayo, inhliziyo ibuhlungu ngodendwe lweminyaka esedlule bengabonani ngenxa yokuphatheka emsebenzini. Bezinengi indaba ebezigcinelwe ugogo. Manje sekuzinyembezi zodwa, ugogo engezwani ngendlebe eseziqedwe yiminyaka.
Akuselanto angayenzela ugogo ikhwabitheke, seyisalukazi esihamba ngezine, esingela mazinyo, esibona kalufifi, lesizwela khatshana, sokusele inhliziyo yodwa zwi! Lamazwi okulaya lokho ekhona lamanje.
“Mzukulu wami ukugqoka kwakho lokhu, sizabona lapho okuyowela khona induku loxakuxaku.”
Wabeseqedile umntomdala, aphenduka amazwi ayizolo; “…induku yisikhali esisetshenzisw’ ukuzivikela, lokuzingela. Amajaha ayazithwala nxa bebhekana lamagusu, obaba bazithwale ngitsho lase mihlanganweni ukuzizimazisa. Nxa umuntu ezidingela okuyesiswini esikhu uxakuxaku akufanelanga asebenzise induku, lanxa iziphukuphuku zikwenza lokhu.” Anabisinyawo ugogo, abeseqhubeka.
“Zwana ke lapha, ulwazi, iminwe, lobuciko okuphiwe yiNkosi yinduku yakho ozingela ngayo impilo yakusasa, qaphelisisa amathuba ohlangana lawo ukuba afanele na ngoba amanye akhona yizihlahla zoxakuxaku othi ungawalandela kungaziwa lapho okuyawela khona induku loxakuxaku!”
Thintana lo Trevor Mhlanga kunombolo zikamakhalekhukhwini ezithi: +263 775 523 605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
