Isigqi somdladla: Isidwabu 21: Maye! Ngenduku emnyama

19 Jul, 2018 - 00:07 0 Views

uMthunywa

Trevor Mhlanga

Kwakungemnandi ngalolosuku lapha abansundu abahlangana khona lamabhunu empini. Induku amabhunu ayeziphethe zazikhafula ukufa, babengadingi kufika eduze, babehlatshwa abadala kungekho muntu obathintileyo.

Ngiyasesaba isibindi sabo sokumelana lesilo esingaziwayo bengathikazi. UGodlwayo ungomunye walaba abafika enyameni yamabhunu. Lanxa impilo enengi yalahleka mzwalokhu, ukubona igazi labangela madolo lalo lichitheka kwaletha ithemba. Babengazi ukuba ithemba kalibulali.

Lihle ithemba, kumele ube lalo ukuze wazi ukuqhubekela phambili lanxa suphelelwe ngamandla. Nxa ulethemba kawusithwa yilokhu ohlangana lakho kunkambo yakho kodwa uqunjwaqunjwa yilokhu okukhangeleleyo.

Ongelathemba, engahlatshwa ngameva esandleni, leso silonda siyabhibhidla inxeba lixhwale acine sequnywe isandla. Lokhu kubangelwa yikuthi igazi lomuntu ongela themba limpompoza usizi lokwehluleka lokufa.

Woba lethemba, kodwa wazi ukuba ithemba lodwa nje kalenzi ukuba ufumane okufunayo! Kukhona okuqakathekileyo kulethemba okumele ubelakho mandulo.

Sebesesigodlweni oGodlwayo lamanye amabutho eNkosi uLobengula, kwakulusizi impela, phela ayemanengi amaqhawe ayewile ngalolosuku.

UGodlwayo ngomunye walabo ababethwele lezinduku ezimnyama ngemva kokubulala amabhunu abezisebenzisa. Linduku iyinkafulakufa ngempela, kusobala ukuba ibazwe ngokuhlanganisa insimbi lesihlahla thize esibaziweyo kodwa isigodo sibanzi kule nsimbi, isimanga yikuthi lokhu ekukhafulayo kuvela ngaphi? Kakuzwisiseki lokhu!

Nangu uGodlwayo ngokudideka okukhulu uyaqala ukuyicubungula linduku, yinduku emnyama, ananzelele insimbi yakhona ibhotshoziwe, isigodo sakhona siyisipatalala, besekusiba lokuyinsinjana okuncinyane okungaba ngango cingo.

Ayibambe linduku, akhangele esikhaleni ukuba abone ukube linsinjana esacingo isuka ngaphi njalo inganani? Kumnyama tshu!

Akula lutho olubonakalayo, abe sesithi kahle ngiyidonse linsinjana ngibone ukuba kuhambanjani, athi uyathi abone kusala, kodwa kuzwakala ukuba ingavuma ukufuqelwa phambili kumbe emuva.

Akhangele njalo esikhaleni ayidonsele phambili, ezwe kuyavuma, abe seyidonsela emuva . . . MAYE!!!

Nxa ungazi ukuba ulutho oluthize lusebenzani akwenzeki ukuba ulusebenzise ngendlela eyiyo.

Kunjalo lasempilweni, nxa ungasazi isizatho sokubakhona kwakho elizweni, akwenzeki ukuba uphile ngendlela eyiyo. Impilo yomuntu ongaziyo injongo yokuphila kwakhe ifana lenduku emnyama, inkafulakufa, esandleni sikaGodlwayo.

Kuliqiniso ukuba uGodlwayo wayeliqhawe, kodwa lokhu akumenzanga waba lolwazi ngenduku ayeyihluthune kubhunu ayelibulele empini. Ithemba olalo, lingakwenza ume isibindi lanxa bekweyisa bethi kawuyi ndawo, kodwa nxa ungela njongo amaphupho akho onke aba yizithukuthuku zenja, lokuwa kwakho kukhulu.

Kumele konke okwenzayo kusukele ekutheni uyazwisisa injongo yempilo yakho, uyazi ongakumela lanxa sokusitsho ukulahlekelwa yikho konke olakho, njalo ulakho umhlaba ozasala ukubambile ngawe lanxa ungasekho, sulele othulini oluqandayo. Maye ngawe nxa ungazi ukuba uphilelani!

Thintana loTrevor Mhlanga kunombolo zikamakhal’ ekhukhwini ezithi: 0775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds