Isigqi somdladla: Isidwaba setshumi lanhlanu: Nxa indwangu ingakhutha ugatsha

07 Jun, 2018 - 00:06 0 Views

uMthunywa

Silo Trevor Mhlanga

UNGAKWENZA konke okusemandleni akho, izithukuthuku ziphelele eboyeni okwenja, uyilime insimu yakho uze uyiphendule, ufake umquba, uhlanyele inhlanyelo enhle, kodwa lingathi “tho” elikaMlimu.

Kungatholakala ukuba uthi uthethe amathuba uceba lamandla usebenza ukhe phansi kwangathi awenzanga lutho. Uyaluhlela uhlelo thize kungabi lamuntu okulalelayo, umeme abantu emcimbini bangezi, uthengise okuthile kungathengwa muntu, uze uqale ukuzikhwathaza ngemibuzo ungafumani mpendulo. Uze uzwe kutshisa esifubeni, kuthi ubambe loba yini ongayithola uyizunguze bese uyimahlazela phansi. Iyabe isikhuthe ugatsha yathi mbo phezu kwebululu.

Okwandileyo nxa ungafika komlind’ uyacina yikuphelelwa yimibono langamandla, lokuqala ukubalisela into esezedlule. Kube lidamu lemibuzo; “Kambe sengigebhe ngatshona kangaka ngiswele lona ilitshe elilodwa elicitsha lifanane legolide?” “Kwenzakala njani ukuba ngitshukatshuke kangaka isembatho lesi silokhu singahlambuluki?” “Manje ngiqonde ngaphi nxa labodokotela abathenjiweyo bethi abangeke bangisize ngalutho, imithandazo yabafundisi labaphurofethi kungathi kayifiki lophahleni, ngitsho lazo izinyanga sengedlula kuzo, kodwa kungathi ngincweba idwala?” Yebo sibili, kuyenzakala ukuba ubone kungasizi ukuba lethemba, uqale ukuzitshela ukuba kungamanga ukuba ithemba kalibulali.

Mhlawumbe laleliya lizwi labelungu elithi ukukhahlela kokucina kwebhiza elifayo kulamandla njalo kuyingozi, ubusubona indlela obusebenza ngayo gadalala, usadalala, njengesibonakaliso sokufa, uhle ube ngofileyo lanxa uzihambela ezitaladeni.

Kulula ukuba ukukhuthala kuphenduke kube yikukhathala, ngoba ukusebenzela ize kubuhlungu njalo kuyaluma njengethumba eselivuthiwe. Leli thumba lingaxhwala libe ngokunye nxa ungaqhubeka ukhala, usesaba ukulikhama.

Kumele wamukele ukuba izinto kaziyi ngokuthanda kwakho sonke isikhathi, njalo lanxa ungenza konke okusemandleni akho ukuba okuthize okwenzayo kuphumelele, kukhona okungekho emandleni akho okungavimba ukuba kungaphumeleli. Nxa ungumlimi kayisuwe onisa izulu, kodwa lokho ongakwenza kuhle ukuba ukwenze kuhle.

Ukukhama ithumba yilokhu; ukuba uqale kakutsha ukuhlela lokulawula amanyathela ozawathatha ukuze ufinyelele lokho ofisa ukukufeza. Thenga inhlanyelo entsha, udinde njalo umquba uze udinge lalapha ongathola amanzi okuthelela ukuze nxa lingananga ungasweli owokuchinsa nje kuphela. Njengendwangu ewele phansi sukuma uzithintithe ubuyele njalo phezu kwesihlahla obukhwele kuso.

Kwesinye isikhathi ukungatholi kwakho lokhu obukukhangelela kuletha uhlupho olutsha, ithi isilukhuthile ugatsha, ihle ithi mbo phezu kwebululu. Kuhle kube yinkemenkeme yendaba, phela yona kayidindi lokuthi ilunywe, ihle iqaleke ngokubona ukufuquzela kwenyoka nje! Ungenza njalo uzakhela umduli ovimba intuba yokuphuma egodini okulo.

Yehlisa iphika ukhokhe umoya, ungaqali ukwenza izinto ngesiphangiphangi ngoba usuwethuswe ngumumo osungene kuwo. Izinqumo ozithathayo lanxa kungangoTshaka ohlangene lakho akumelanga ingqondo yakho iphelele kulokhu okukhangeleleyo kuphela, kodwa lakulokhu okuzayo kusikhathi esizayo. Kwenzakalani ungaba ngokhalayo kodwa ungathathi nyathelo lokuzenyula kulobu buhlungu obukukhalisayo?

Ekulungisiseni okhangelane lakho, qondana kuqala lokuphuthumayo, kumbe okuyilo uhlupho olukhulu impela phakathi kwalezo ezikhangelelane lawe. Nxa ungathola indlela yokumelana lakho, kuba lula ukuba lamandla okumelana lokunye okuseleyo.

Njengethumba, akumnandi ukulungisisa ikhakhulu nxa uzame kwehlula izolo wena ubuthembile ukuba ukwenzile konke ukufaneleyo ukuba uphumelele. Kodwa njengoba abadala besitsho, akulahlwa mbeleko ngokufelwa. Nxa ungaqeda inyanga ezimbili loba ezintathu ugebha ungatholi lutho, lakunyanga elandelayo uyavuka usiyagebha njalo.

Lokhu akutsho ukuba inzuzo ozayithola izaba ngephindaphindiweyo, kodwa izakupha ithemba lokuba ukuphikelela kuyaletha impumela. Isifundo esikhulu lapha yikuthi kwesinye isikhathi, ukungatholi zithelo ozikhangeleleyo emsebenzini owenzayo akubangelwa yikuthi awenzanga obekumele ukwenze, ziyaswelakala usale ubambe owangaphansi wena wenze konke okusemandleni akho. Okumqoka yikuthi sinqumo bani osithathayo nxa indwangu isikhuthe ugatsha!!!

l Thintana loTrevor Mhlanga kunombolo zikamakhal’ ekhukhwini ezithi: +263775523605.
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds