uMthunywa
Umsindo wembuzi nxa zisesibayeni wedlula owenyeza nges’khathi sezulu. Ungasondela eduze uzwa zidutshuzana uze uzizwele, ucabange ukuthi mhlawumbe enye yazo ingavuka amathumbu sewohlokele phansi.
Kuthi kusisa ugijimele esibayeni uthwele amehlo, ufice ziqine saka zonke imbuzi zakho, uze ufunde ukuba umsindo wembuzi esibayeni yinhlalo yazo, akumelanga kukudlele umzimba lokho.
Kukanengi uzihlupha ngomsindo ngalokhu lalokhuya, ugijima ugcwale indawana yonke ngomyalezo owuthole kumakhalekhukhwini; uphelelwe lithemba ngendaba zabasiki bebunda. Kanengi okukukhathazayo ngumsindo wembuz’ esibayeni, akumelanga uzihluphe ngakho.
Balahlekelwe yiz’hlobo, bagula kwaqhuqh’ isizwe, kwavalw’ imihlangan’ emikhulu, kwacelw’ imali kumphakathi, kwand’ ingxoxo, kwaguquk’ indlela yokubingelelana. Ngomkhuhlan’ uMqedathumbu i-cholera.
Izibhedlela ziphelelwe yimithi, izikhulu zam’ ukunath’ amanzi empompi, amatshapha afunda ukuhlanzeka, lomongameli welizwe wadinga imikhondo yokumelana layo.
Ngumkhuhlane omubi lo, ungakubamba siyakugijimisa isisu amathumbu asale engela ngitsho ithonsi lamanzi, yikho nje ngiwubiza Mqedathumbu. Uyaphelelwa ngamandla ube yingubo endala exatshwe lilanga.
Ungadingisisa imbangela yokusobola kanje ngomkhuhlane lo, ngamagenga ayabe engene emzimbeni azenzela intando.
Agangile amagenga, ayingozi, njalo ngaze uweyise ngobuncane bawo uthi “angenzi lutho”, ayakuqeda amathe ngezenzo zawo. Nxa esengenile esimweni sokusebenza abonakala ngokuthwala inhlabathi, ingavela inamathele’ esihlahleni, loba kusilimo thize, siyakhiwe indlu yawo.
Okulandelayo yikuzwa kuthiwa “isihlahla loba isilimo thize sesidliwe ngumuhlwa,” sesebenzile amagenga!
Amagenga abangela umkhuhlane i-bacteria, lawo asebenza ngendlela efanayo, kanengi nxa umkhuhlane subonakala, kade umonakalo waqala. Imigcozo yebo ingasebenza ukuwulwisa osukubambile njengoba uMqedamathumbu bephakathi kokulwa lawo, kodwa evele segelezile.
Qaphela lokhu, into ozihlupha ngazo ngenxa yokuba zisemlonyeni womuntu wonke, ezinengi zakhona kazikusizi. Okuyikho okungakuphazamisa kumbe kukwakhe kungakhanya kuyintw’ eyeyisekayo, engeladumo.
Zihluphe ngakho khonokho funa kukuvimbele impumelelo. Sama isizwe ngamagenga abangela uMqedathumbu, leyakho impilo ingama ngezinto ezincane ozitshaya indiva kukanti ziqakathekile.
Omunye uyalahlekelwa lithuba elihle ngokungabingeleli nje! Ithuba lokuzingconoza ledlule ngamawala; omunye njalo aziphaphisele inyoni abeseyibambile ngokuthanda ukukhuluma; omunye ngozikhipha ukudla emlonyeni ngokungenela indaba ezingelani laye.
Lezi nje yizibonelo zemihlobohlobo yamagenga angakubhidhliza ungekela ukuwaqaphela. Cabangisisa ngomahluko wembuzi lamagenga, obona ngelihlo lentwala uyakunanzelela ukuba imbuzi idume ngomsindo ongatsho lutho. Kufana xathu legabha, asimsindo nxa litshaya umoya, kodwa amagenga kawanjalo.
Lanxa engathuzana endleleni awukuzwa, konke kwenziwa ngokuthula besekubonakala ngomonakalo ukuthi asebenzile. Akusi muhlwa odla izihlahla lezilimo zethu, okumele ukulwise akusi mkhuhlane, qeda amagenga empilo yakho wenqabele ingozi kusasa. Wazi ukuthi nxa ulinde ukuzwa ngomkhosi ukuthi sekulengozi, azakulungisa amagenga, adle ethule!!!!
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
