uMthunywa
Silo Trevor Mhlanga
Kubikwa esabelweni sakoNtunjambila isikhukukazi sabonakala sibhodabhoda egangeni. Sasilokhu sihamba sisidla siziphandela, sathi siyathi mehlo suka, nantiya iqanda elingajwayelekanga. Zukuzuku laselithethwe leliya qanda selisiyafakwa kwamanye ayelungiselwe indawo koMthethwa.
Secacadiwe la maqanda, leliya eladojwa egangeni lakhipha isinanakazana esingafani lamanye amatshiyane, kodwa okuyinyonyana lokhu kwakungaziboni ukuthi akufani lezinye. Njengamanye amatshiyane linyoni mahluko yacatsha ngaphansi kwamaphiko esikhukhukazi nxa kusondela okubonakala kuyingozi, yafunda layo ukudla iphanda phansi lokhu yayingazi ukuba iyinyoni bani, yaphila satshiyane ingagqize qhakala.
Kwakungemnandi ukukhula esilugwini, yayisizwa linyoni ukuba kukhona okunuka santungwana. Ukudla okwayikhulisayo kwakungakhwabitheki kuyo, ukukhala kwayo kungazwisiseki ngoba kungafani lokwabanye lapha ekhaya. Kwahawulisa oku nyoni mahluko, kuzibona kuyindlubu ewele ephokweni. Isikhukhukazi sikubona lokhu sakhathazeka, sadinga ukuba lindaba singayiqala njani, sazitshela ukuba le yimfa layo ngezake kulunge iqiniso lingazakala, kwasekusobala manje kuso ukuba le yinyoni bani.
Okulempondo akufihlwa emgodleni, lwafika usuku oluyisithutha lapho ukhozi lwavakatshela koMthethwa, amatshiyane aphaphatheka edinga unina; kodwa mzwanokho ngokokuqala selokhe yathetshulwa yingwe, linyoni mahluko yezwa eyinye inyoni ekhala njengayo. Inkalakatha yenyoni endiza ngamandla langesiqubu sesavunguzane. Mzwanokho amanye amatshiyane ebalekela ukusiza impilo zawo kwabonakala unyoni mahluko elokhu ebuka linyoni eyingozi ezayo engagqize qhakala.
Ayizange ifane impilo emva kwaleliya ilanga, unyoni mahluko wayesezazi, esesazi ukuba kadingi kudla lokhuya kudla okungahlabusiyo, kumbe ukuhambela phansi njengabo sowabo akhule labo. Waqala manje ukuzifundisa ukuphapha. Kwakungelula ukuba aphakame ayefika ephahleni nje, amaphiko ayengeneli ukuba amphakamise. Kwakungavumi ukuba unyoni mahluko aphumelele ukufika ngitsho phezu kwesihlahla elokhu ehlala esilugwini, kwasekuyisikhathi sokusuka koMthethwa, ukutshiya indla zayizolo lokubhekana lempilo entsha. Wayesekufundile ukuba loba ungubani nxa ufuna inguquko kumpumela kumele untshintshe indlela owenza ngayo izinto. Kwakukuhle ukuba isikhukhukazi sondle unyoni mahluko, kodwa wayengeke azazi ngokupheleleyo engasukanga waya eguswini elingaziwayo, kanti vele wasuka khona.
Into ezine ezitholakala kulindatshana; hlonipha amanyathelo okumele uwathathe nxa ukhula kulokhu okwenzayo, inhlwa kayibanjwa ngekhanda. Unyoni mahluko eseseliqanda lasekukhuleni kwakhe kwakungavumi ukuba akhanye sesehlukana lesikhukhukazi esimlondolozayo, kumbe sesala ukudla okungamhlabusiyo. Okwesibili yikunanzelela umahluko wakho kwabanye; lanxa unyoni mahluko wayengakaluboni ukhozi wazi ukuba akasi tshiyane, kukhona okukhulu lokungcono ayikho. Emva kokuhlangana lokhozi okokuqala wahle wazama ukufana lalo, wajaha ukuphaphapha engakakufundeli ngokupheleleyo; okwesithathu yilokhu funda ukubekezela. Impumelelo iza kwabazi ukulinda lokubekezela emsebenzini wabo. Okokucina yilokhu, nxa ithuba lingafika yenza okwenziwa ngunyoni mahluko, waphuma esilugwini wandiza wahamba engagqize qhakala!
Thintana lo Trevor Mhlanga kunombolo zikamakhal’ ekhukhwini ezithi: +263 775 523 605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
