uMthunywa
Silo Trevor Mhlanga
QAPHELA abantu abakuzingelezileyo, ukhona ozisondezayo, ozibiza umngane wakho kodwa kusobala ukuba ungumkhaza. Ukhona njalo oseduze kwakho ngobuqotho, umngane wobutsha bakho, eladlala lonke u-ski; usaphila ngokukhongozela. Okwazi kamhlophe ukwedlula abazali bakho. Nguye omtshela yonke inonovithi, likhulume lize liqamelame, elingamathe lolimi.
Lowo-ke nguye olamandla okukuphendula isimilo, aguqule indlela okhuluma ngayo lohamba ngayo, ngitsho logqoka ngayo. Ukwenza kwenu lobabili kucine kungamadolo embuzi kumphakathi ukuba lizimbila zantabanye. Umngane onjalo, kasabalwa njengomdeni kuphela, kodwa uba yingxenye yakho, othinta yena ufana lomuntu okuninda ingotsha emehlweni.
Ugwalo olungcwele iBhayibhili, likhuluma ngombuso wezulu kolunye uluhlu liletha umqondo wokuthi izitho zomzimba zingakwenqabela ukuba uye khona. Lapha inkosi yethu uJesu ithi yona nxa isandla sakho sikwenza ukuba uphambuke endleleni, siqume; kungangcono ubone umbuso wezulu lesandla esisodwa kulokuya esihogweni lezandla zombili. Abuye atsho amazwi afanayo ngonyawo, langelihlo.
Ubuhlungu bokujuqula isandla kumbe unyawo, kumbe ukupantshaza ilihlo bungechasiswe. Akulula ukuthi lanxa usazi leso sitho esikubangela ukuba wone bese usihlahlela ngehloka kumbe nxa kulilihlo ulijuje ngenalithi. Umcabango onje uhlobisa igazi, wenza kube mgceke ukuba uhambo lokuya ezulwini lulukhuni.
Ikanti isithembiso sempilo engapheliyo lentokozo engelinganiswe yasezulwini kuyamnika ozimiseleyo inkuthazo yokuqunga isibindi ajuqule isandla kumbe apantshaze ilihlo engathikazi.
Ungafika lapho okumele ukhethe phakathi komngane lempumelelo, akubi mnandi. Kuyenzeka ukuba unanzelele ukuba ingqubekela phambili kumpilo yakho esikolo, kumbe emsebenzini, kumbe kubhizimusi ibanjwe yikuzwana kwakho lomngane oqotho. Umngane lo mhlawumbe uyabe seke wakusiza ezikhathini ezedlule, wakumela lapho kumele ugconwe, wakuhlenga ezizibeni ezimnyama, wakusondelela usezikhathini zokuhlupheka.
Uthi ungacabanga la elivela khona lalumngane ziwohloke, imbali elilayo yinotho engedliwe yinondo. Nanku-ke lapha sokuyisikhathi sokukhetha phakathi kokuqhubeka ngobungane kumbe ukukhwela kulele lempilo.
Ungezake ube lakho kokubili, nxa ukhetha ubungane khohlwa ngengqubekela phambili! Lesi yileso simo esifaniswa lokuquma isandla kumbe unyawo, kumbe ukukhipha ilihlo. Isinqumo osithathayo ngesiguqula impilo yakho kokuphela isiya phezulu, kumbe phansi.
Akungeke kuhambe konke njengokuthanda kwakho, isitsho sendulo sithi oyitshayileyo kayisuye oyidobhileyo, loyidobhileyo kayisuye oyosileyo, loyosileyo kayisuye oyidlileyo, oyidlileyo udle icala. Ngamafitshane nxa sibenzisa lesi sitsho kulindaba singathi ukuyidla yikho ukuphumelela kulokhu okwenzayo empilweni. Kuba licala ukuphumelela ngokuthi kuza emva kokuba sulahle, njalo walahlekelwa ngokunengi okungahlanganisela ukutshiyana lomngane othandekayo. Ubuhlungu bokulahla ubungane bugabhela obokuziquma isandla kumbe unyawo, kodwa ukuze ufinyelele lapho okhangelele ukuya khona, ungakhekhelezi, quma!
Thintana loTrevor Mhlanga kunombolo zika makhal’ ekhukhwini ezithi: +263775523605
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
