uMthunywa
YiNtatheli kaMthunywa
KULEMULI yeNtunjambili, eMatobo ezidla amathambo engqondo ngokucatsha kwamaphambili, ilihlo kanye lolimi lwesidumbu selinye ilunga layo. Ukucatsha kwezitho lezi sokubangele ukuthi kube lokuphoselana inyoka ephilayo phakathi kwamapholisa kanye labakhokheli besinye isibhedlela sakoBulawayo nanko phela bathi kabazi lutho ngezitho lezi ezingabonakaliyo, uMthunywa uyakuveza lokhu lamhlanje.
Isiga lesi senzakale ngeviki ephelileyo lapho umuyi uMduduzi Sibanda atshaywa ngumsolwa uIsaac Tshuma wamtshiya ebangwa lezibi.
Umuyi kubikwa wabhubha esanda kufika esibhedlela seUnited Bulawayo Hospitals (UBH) koBulawayo evela eNtunjambili eMatobo.
Intatheli ixhumane lesinye isakhamuzi sakule indawo esiziveze ngokuthi nguSikhomanisi nje kuphela sathi badidekile ngokwenzakala kumuyi.
“Kuyisimanga lokho ukuthi izitho zakhe ezibalisa ulimi, ilihlo lesitho sangasese kwakhutshwa lokuthi kwayangaphi akula okwaziyo.
“Esibhedlela wahanjiswa ephila ngoba wayesenelisa lokuphakamisa isandla. Okusiphicayo yikuthi kuyenzakala yini ukuthi umuntu owahlaselwayo wadojwa ngemva kwesikhathi ecuyiwe enelise ukuyafika koBulawayo ephila,” kutsho uSikhomanisi.
Esinye isakhamuzi esiziveze ngokuthi nguMichael Ndlovu siveze ukuthi isimanga yikuthi kungani amapholisa amthwalayo engananzelelanga ukuthi ukhitshwe izitho lezi ezintathu.
“Kambe kuyenzakala yini ukuthi umuntu umphakamise kodwa ungaboni ukuthi ucuyiwe khona labesibhedlela kungani bengazange bakubone lokhu,” kutsho uMnu Ndlovu.
“Abasiki bebunda kanye lezihlobo sebecabangela ukuthi mhlawumbe lokhu kwenizwa ngosamabhizimusi abadinga inotho besebenzisa izitho zabantu lanxa singelaso isiqiniseko salokho,” kubika uMnu Ndlovu.
Ekhuluma loMthunywa onguye owathwala umuyi esiya esibhedlela sakoBulawayo uMnumzana Alvin Moyo uthe wamthwala ephila.
“Mina bangicela ukuthi agijinyiselwe esibhedlela engxenye angathola usizo. Ngesikhathi ngifika wayesaphefumula ephakamisa isandla okutshengisa ukuthi wayesaphila.
“Kwacelwa udokotela ukuthi ambone masinya wafika wabika ukuthi usedlule kodwa kasabikanga ukuthi kulezitho ezingekhoyo,” kuchaza uMnu Moyo.
UMthunywa uxhumane lesihlobo sikamuyi uMnumzana Nyasha Sibanda oveze ukuthi bafonelwa sekuthiwa umzukulu wabo usebhubhile.
“Sabuya sazothatha isidumbu sisisa ekhaya okuyilapho esabona khona ukuthi isidumbu sasingelalimi, ilihlo kanye lamaphambili.
“Ukuthi izitho lezi zakhitshwa ngubani asikwazi mhlawumbe zacatsha khonale eMatobo ngesikhathi ehlaselwa kumbe esibhedlela akula owaziyo.
“Esikusolayo nje ngabesibhedlela yikuthi kwakumele basibikele ukuthi kulezitho ezingekhoyo ngoba ukungasibikeli kwabo kutsho ukuthi umuntu wethu wenele,” kulandisa uMnu Sibanda.
“Sasingaselamali yokuthi siphendukise isidumbu koBulawayo kungakho sacina singcwaba kunjalo. Angikhulumi okunengi mina kodwa uzimu luzangena komunye umuzi bazabubula. Angibhodwa mina,” kubika uMnu Sibanda.
Iphephandaba likazulu lizwe ukuba akulampendulo ecacayo izihlobo eziyitholayo emapholiseni lasesibhedlela. Intatheli ixhumane lomele isikhulumi samapholisa esabelweni seMatabeleland South uSergeant Ndabezinhle
Mkhwananzi oveze ukuthi balindele amaphepha okuhlolwa kwesidumbu avela esibhedlela.
“Asikatholi umbiko wokucatsha kwezitho zomzimba kumele silindele incwadi kadokotela yombiko wokuhlolwa kwesidumbu ozavela esibhedlela,” kutsho uSgnt Mkhwananzi.
Ekhuluma loMthunywa uChief Executive Officer wesibhedlela seUBH uNkosikazi Nonhlanhla Ndlovu uveze ukuthi indaba enjalo kayidingwe emapholiseni kumbe emotsha.
“Buzani amapholisa ngendaba yokucatsha kwezitho lezi lasemotsha yeUnited Bulawayo Hospital,” kubika uNkkz Ndlovu.
Esinye isisebenzi semotsha yeUBH esiziveze ngokuthi nguNkosikazi Sibanda nje sithe kasifuni kuzwa ngendaba le.
“Angikhulumi lentatheli lokho okokucatsha kwezitho zomzimba kamuyi angifuni kukuzwa ngitsho lakancane endlebeni zami,” kuphetha uNkkz Sibanda.
