uMthunywa
Ethel Ncube
ZISELE zikhakhamele izakhamizi zeMalamulela, eZhombe ngemva kokuba omunye umfana ehlahlele uyise wafa kubangwa imemory card.
Isiga lesi senzakale kuyonale iviki lapho uTimothy Moyo angene endlini wadobha ihloka wagamula uyise omncane uGabriel Moyo wahle wafa kubangwa ukuthi ngubani okhuphe imemorycard kumakhalekhukhwini.
Esinye isakhamuzi sakulindawo uNkosazana Bekezela Moyo uchaze ukuthi abantu basele betshe amathe ngesenzo sikaTimothy esokubulala umzali wakhe.
“Ngikhuluma nje abantu balokhu besakhakhamele ngalokhu okwenzakale kulindawo.
“Sibuhlungu kakhulu ngendlela impilo echitheke ngayo nje kubangwa into engelamsebenzi.
“Kubikwa umsolwa wathunywa nguyise ukuthi ayemthathela umakhalekhukhwini wakhe lapho ayemtshiye khona etshajwa kodwa kukhanya ekuphendukeni kwakhe lomakhalekhwini wayengasela memory card okwabangla uyise ukuthi ambuze ukuthi ingaphi,” kutsho uNkszn Moyo.
UNksz Moyo uqhubekele phambili wathi kukhanya angani uTimothy kazange aphendule uyise ngendlela eyamsuthisayo yikho nje kwavuka umsindo.
Uqhubekele phambili wachaza ukuba lo osengumuyi wayelokhu ephethe esithi uTimothy umqambela amanga umfana wacina engena endlini lapho abuya esephethe ihloka wabelithela phezu kukayise wahle waphela khonapho.
Intatheli ixhumane lesikhulumi samapholisa eMidlands uInspector Ethel Mukwende obike ukuba udaba olunjalo lufikile ewofisini yakhe.
“Udaba lomuntu obulele omunye kubangwa imemory card ngilutholile. Engikuxwayisayo yikuthi abantu kumele bahloniphe impilo kungakho nxa kuthe kwaba lokungezwani phakathi kwabantu kumqoka ukuthi abantu bakhulumisane kuhle kumbe badinge omunye ongabacebisa ingxabano zimane zilungisiswe,” kuphetha uInsp. Mukwende.
