uMthunywa
Cornelius Luphahla
NJENGOBA isikhathi sokufaka umquba sesifikile abalimi bakhuthazwa ukuba bafake inhlabathi yeziduli emasimini abo ngoba layo iyavundisa.
Abalimi abangelawo umquba njalo belima emahlabathini balakho ukuthi bafake inhlabathi yeziduli emasimini ngoba ingumquba otholakala lula.
UMthunywa ukhulumisane lomunye umlimisi weLupane, uNkosazana Senior Magadzire oveze ukuba inhlabathi yeziduli ingumquba olamandla okukhulisa izilimo kuhle kakhulu.
“Inhlabathi yeziduli iqakathekile kakhulu kubalimi ngoba ingumquba olamandla njalo ophuza ukuphela.
“Inhlabathi le ifakwa njengomquba wenkomo ngokuhazwa kusukela ekupheleni kukaMpandula kusiya ekupheleni kukaMfumfu,” kuchaza uNkszn Magadzire.
Uqhubekele phambili esithi inhlabathi le ifakwa emahlabathini kuphela njalo kayifakwa kakhulu.
“Isiduli senza umlimi abe lesivuno esihle kakhulu nxa umlimi engasifaka emasimini akhe.
“Abalimi bakhuthazwa njalo ukuba bazi ukuthi inhlabathi le kufanele bayifake ngesilinganiso esincane ngoba ingatshisa izilimo ikakhulu nxa izulu lililutshwane,” kutsho uNkszn Magadzire.
UNkszn Magadzire ubike njalo ukuthi isiduli silungele ukufakwa lapho okulinywa khona izilimo ezifana lomumbu kanye lamabele.
Inhlabathi yesiduli kubikwa iyasiza njalo ekuvikeleni izibungu ezidla impande zezilimo ngoba inengi lazo kaziphili lapho okulesiduli khona.
