uMthunywa
Nkosilathi Sibanda
UMQEQETSHI weFC Platinum uNorman Mapeza engabe eseyibambe ngezandla zombili inkezo yeCastle Lager kodwa uyakuvuma ukuthi engakhitshwa iqatha emlonyeni nxa ithimu yakhe ingaxegisa kumidlalo yeCaf Champions League abayiqale izolo.
UMapeza ubika ukuthi ukudlala ngokukhaliphileyo yikho okungayisiza ithimu yakhe kulesi isibanga somdlalo.
Izimbamgodi lezi ziqede impelaviki ngokuthaba kulandela ukuthwala kwazo inkezo yeligi yeCastle Lager.
Iqembu leli likhangelele ukuthi ledlulele phambili kwesigaba sakuqala somncintiswano ukuze litshengisele ukuthi lonyaka lizimisele ukuba lodumo eAfrica.
Kuthe uMthunywa etshaya ucingo edinga ukuxoxisana loMapeza, lumqeqetshi uzwakale ngokuhlekelela ukuthi kuyamjabulisa ukunqoba kweqembu lakhe.
Ekhuluma loMthunywa phambili komdlalo wabo le CNaps Sport, iqembu leMadagascar edolobheni leAntananarivo, uMapeza ukuvezile ukuthi kuzamele ayibophe ngamandla.
Uthe isicelo sabo sikubalandeli benguqu kuleli ukuthi basekele iqembu lakhe.
“Loba bekhona abangasekeli iqembu lethu, isicelo sethu ngesokuthi sithole usekelo olugcweleyo nxa sesidlala okwesibili sisekhaya.
“Okumqoka yikuthi sinqobe yonke imidlalo kulumncintiswano. Ukudliwa kwethu ngomnyaka odluleyo kwasifundisa ukuthi silolonge sizimisele. Angeke sithi sesizintshantshu kuligi yethu kodwa sehluleke ukubonakala emncintiswaneni yase-Africa,” kutsho lumqeqetshi.
Umqeqetshi uqhubeke wathi: “Imidlalo yeChampions League ifana layo yonke esasiyidlala kuligi. Siqhubeka ngegiya linye silenhloso yokunqoba.”
