uMthunywa
Nomthandazo Ndlovu
ZIKHULUMA zingaqedi izakhamizi zesigabeni seNkalange, eGwanda kulandela ukubanjwa kwesinye isalukazi sibhunyumunyu phezu kwesidumbu.
Linkemenkeme yendaba yenzakale ngeviki ephelileyo lapho isalukazi esaziwa ngokuthi nguLydia Ndlovu owaziwa kakhulu ngokuthi nguNaChady sigijime satshiya izakhamizi zibambe eyangaphansi ngemva kokubanjwa siphezulu kwesidumbu sikankosikazi kasobhuku okwenza kucatshangelwe ukuba nguye olesandla ekufeni kwakhe.
Ekhuluma loMthunywa uNkosazana Bridget Siwela uthe selokhu wathwetshulwa yingwe kakaze abone into ayibone ngeviki ephelileyo.
“Kunengi esengake ngakubona lapha emhlabeni, kodwa okokuthi uzivukela ekuseni usiyabasa umlilo emkulwini udibane lesalukazi esinqunu sidlula siyisavunguzane phambi komuzi wakho kungiqede amandla, ngiphelelwe ngilapha,” kutsho uNkszn Siwela.
“UMaNdlovu vele kuyaziwa ukuthi kalali, sizwa kuthiwa wabulala umfowabo, khathesi sebanjwe enqunu phezulu kwesidumbu kumbe ubemenzani unkosikazi kasobhuku ngoba kukhanya ubesesehluleka ukuphuma ilanga laze laphume umuntu eganga,” kuchaza uNkszn Siwela.
Kuzwakale ukuthi inengi lezakhamizi zesigabeni lesi liyamesaba ugogo uMaNdlovu ukuthi bangamphambanisa sengavuka ephezulu kwabo, lokhu kube sobala ngoba izakhamizi ezinengi bezingafisi ukukhuluma lentatheli.
Esinye isakhamuzi esithande ukwaziwe ngokuthi nguMleya kuphela sithe umuntu onjengoMaNdlovu kumele axotshwe esigabeni uyingozi.
“UMaNdlovu ngumVidikho ngakho umuntu olesikhundla esinjalo emphakathini nxa sezayenza ihlazo elinjalo uthi bazamhlonipha njani abantu? Kumele axotshwe esigabeni umama lo ngeke senelise ukuphila laye, bakhule njani abantwabethu endaweni elomuntu ogange kangaka?” kutsho uMnu Dube.
Kubikwa ngemva kwesiga lesi uMaNdlovu kabonakali lokhu kungaziwa ukuthi wabaleka wangena kuwuphi umgodi.
Ibuzwa ngodaba lolu induna uMarupi ithe isikuzwile ukuthi umkasobhuku ubhubhile kodwa indaba kaMaNdlovu ubengakayizwisisi.
“Ngizwile sibili ukuthi umkasobhuku usedlule kodwa okukagogo obanjwe engagqokanga bengingakakuzwisisi ngoba okwakhathesi ngiseGwanda,” kutsho induna uMarupi.
Imizamo yokukhulumisana loSobhuku uMvakatshi yehlule ngoba ucingo lwakhe lwalile ukungena.
