uMthunywa
Cornelius Luphahla
KULENYANGA yesigabeni seTokwe eNkayi okucatshangelwa ukuthi yabulala umntanayo laye oyinyanga imbangisa ukuthi wayeselapha ngcono kulaye okwakubangela ukuthi bagijimele kuye okubikwa ukuthi kayipoki nje idla ubhedu nanko phela isibonakala ngitsho lemini ehamba, uMthunywa ukuzwile lokhu.
Indaba le kubikwa isileminyaka emibili yaqalisa lapho uNkosazana Siqhelisiwe Mnkandla axabana khona lomntanakhe uMnumzana Sikhumbuzo Sithole bebanga ukuthi usemthathela abantu bokwelapha qede wafa okuyikho okudala ukuthi kucatshangelwe ukuthi wabulawa ngunina.
Kuzwakale ukuthi umuyi wathi ngemva kokufa waqalisa ukubonakala emzini wakhe kanye langakibo ebusuku lemini okwacina kubangele ukuthi umkakhe abaleke atshiye umuzi.
UMthunywa uxhumane loMnumzana Nkululeko Sithole onguyise omncane kamuyi wathi uzwa ubuhlungu ngokufa komntanomnewabo ngoba kusobala ukuthi wabulawa.
“Mina ngizwa ubuhlungu kakhulu ngokufa komntanomnewethu ebulawa ngunina embangisa ukuthi ulamandla okwelapha abantu kulaye. Ngitsho lokhu ngoba unina wazikhulumela ukuthi kasamfuni eduzane lomuzi wakhe ngoba usemthathele abantu bokwelapha.
“Ngemva kwalokho ababili laba babehlala bexabana unina waze wathi uzazibonela. Ngemva kwalokho akuphelanga amaviki amabili uSithole wafa ethi utshiswa ngumlilo. Engakabekwa wayesebonakala ehamba emzini wakhe kanye lokanina ekhuluma ethi wabulawa ngunina. Ngikhuluma nje, lokhu simbona,’ kutsho uMnu Sithole.
UNkosazana Liziwe Nyoni oyisakhamuzi sakule indawo ubikele intatheli ukuthi akudlulwa eceleni komuzi kamuyi uSithole ngoba ubonakala nsukuzonke njalo umuzi wakhe kawukhanyi ukuthi kawuhlali muntu.
“Isigaba sonke siyakwazi ukuthi akudlulwa emzini kaSithole ngoba kwesinye isikhathi uyambona emini ezihambela. Ebusuku khona angikhulumi ngoba kuhlala kukhanyisile njalo ungadlula khona ungakwazi uyambona uhle ulahleke uze ubone indlela ekuseni.
“Okungimangalisayo yikuthi umuzi wakhe ungathi ulabantu abahlala khona ngoba akulatshani ngitsho njalo akula ngcekeza. Lokhu kuveza sobala ukuthi kukhona owucentayo,” kutsho uNkszn Nyoni.
Ebuzwa ngale indaba uNkszn Mnkandla uthe yena kakwazi ukuthi umntanakhe wabulawa kuyini wasevuma ukuthi uyapoka.
“Mina kangikwazi ukuthi umntanami wabulawa kuyini njalo ngamanga ukuthi yimi engambulalayo sibanga abantu bokwelapha. Yebo kambe sake sangazwani ngenxa yokuthi abantu basebemandela kakhulu kodwa engabalethi kimi kodwa kangizange ngaba lendaba lakho kakhulu lokhu.
“Loba kunjalo kuliqiniso sibili ukuthi uyake abonakale emini ehamba emzini wakhe kanye lakowami kodwa kangikwazi ukuthi kubangelwa kuyini lokhu kodwa ngisazama ukukulungisa,” kuphetha uNkszn Mnkandla.
