IPHINDELA EMFOLWENI ITSHILAMOYA

IPHINDELA EMFOLWENI ITSHILAMOYA

0 262
Madinda Ndlovu

Nkosilodumo Ndebele
SIGCWALISEKILE isaga esithi indoda ngewa ivuke ngemva kokuba iBosso inqobe iMutare City eMagumeni ngoLwesibili emini.

Besebelahle ithemba abalandeli beHighlanders ngemva kokunqotshwa kweqembu ngotsheketsha, iNgezi Platinum ngempelaviki bethi abafana sebephume emfolweni ngokudliwa.

UNewman Sianchali umdlali omkhulu weHighlanders kube nguye iqhawe kwabanengi ngemva kokuhlohla imvema yebhola ngomzuzu wesi-77 okuyiyo ehambise iMutare City ngakibo ikhala.

Loba nje linqobile iqembu lelizwe lonke, okusuke kwangajabulisi abalandeli abanengi yikudlaliswa kwamathuba okuhlohla ngabagadli beqembu.

Umqeqetshi weqembu leHighlanders uMadinda Ndlovu uthe kungelinye ilanga ngabe iqembu lakhe lithele amabhola amanengi emambuleni kodwa kube ngumnyama nje ukuthi benelise ukuhlohla elilodwa qha.

Loba nje bekungutshiki lobhanqa kulo umdlalo, iBosso ibizenzela umathanda isikhathi esinengi emdlalweni lo.

“Sibe lomnyama wokuthi sehluleke ukuhlohla ngemizuzu yokuqala yalumdlalo kodwa amathuba besiwathola loba nje abadlali bebengawasebenzisi.

“Angeke ngibasole abafana ngoba bebelovalo ngenxa yokuthi umdlalo wabo wokucina banqotshwa kodwa ngilethemba lokuthi imidlalo ezayo bazathuthukisa indlela abadlala ngayo behlohle amabhola amanengi,” kutsho uNdlovu.

UMthunywa wenelise ukukhuluma labalandeli beBosso abakhale ngokuthi iqembu liswela ingcitshi zabadlali ezikwazi ukuhlohla amabhola amanengi ngomdlalo owodwa.

“Kuseselomsebenzi wokuthuthukisa abadlali beBosso ngoba bayakhutha kakhulu ukulithela emambuleni.

“UMadinda Ndlovu usesebenze kakhulu ukwakha iqembu labafana abatsha kodwa inkinga yikuthi laba abathenjiweyo ukuthi basihlohlele amabhola uOzias Zibande lo Newman Sianchali abenelise ukudlala kuhle bengekho ndawonye.

“Kumele uMadinda abafake bonke ukuze benelise ukuhlohla sinqobe singathwalanga nzima,” kutsho umlandeli weBosso uMluleki Moyo.

“Abanye abadlali abenelisi ukudlala inguqu okwemizuzu engu-90, kungakho uMadinda kumele adinge abanye abangabangenela nxa laba abaqalileyo ukungena sebediniwe,” kuqhubeka uMoyo.

SIMILAR ARTICLES

NO COMMENTS

Leave a Reply