uMthunywa
Cornelius Luphahla
KULEMULI yakoSibanda esiqintini seMaqaqeni koSigola elokhu ididekile kulandela ukukhitshwa kohalabezi lwenyoka okubikwa belumunya amalunga emuli le igazi ngenhloso yokubulala inhloko yomuzi.
Insindabaphenduli le yenzakale kuviki ephelileyo lapho abaphurofethi abakhiphe khona inkalakatha yebululu lizithandele phakathi kwebhasikiti emzini kaJoseph Sibanda ohlala ngaphansi kukaSobhuku uMishek Gumede.
UNkosazana Siphiwe Ndebele oyisakhamuzi esigabeni lesi uchaze ukuthi yena wayekhona mhla kuphuma inyoka le .
“Mina ngangikhona mhla abaphurofethi bekhipha inyoka le ngakho bathi sebeyikhiphile akusacacanga kuhle ukuthi inyoka le ngekabani ngoba bathi abafuni kuxabanisa izakhamizi ngoba bengamqamba umnikazi wayo uzazondwa ngabantu,” kutsho uNkszn Ndebele.
Ekhuluma loMthunywa uThemba Sibanda omunye wabantwana bakaMnu Sibanda okukhitshwe khona inyoka le uchaze ukuthi inyoka le yakhitshwa sibili kodwa kayisiyo yabazali bakhe.
“Kuliqiniso sibili ukuthi abaphurofethi bakhipha inyoka eyayisebhasikitini bathi igciniswe ngomunye wabomakhelwane bethu ngenxa yomhawu.
“Inyoka le noma nje yakhitshwa ngakithi kodwa sesizamile ukubuzisisa abazali ukuthi ingabe ingeyabo yini kodwa sesibonile sibili ukuthi asiyo yabo. Lokhu kusuka kungidanise ukuthi pho inyoka le ngekabani ngoba abazali bami bayakhonza ngeke bagcine inyoka,” kuveza uMnu Sibanda.
Ekhuluma loMthunywa uMnu Joseph Sibanda onguye umninimuzi okwakhitshwa khona inyoka le uchaze ukuthi indaba le yenzakala ngakho kalamathe.
“Inyoka yaphuma emzini wami njalo yayiphakathi kwebhasikiti endlini enkulu njalo kwakulibululu. Abaphurofethi laba bathi inyoka le sileminyaka emithathu iphila njalo ifuna ukuthi ngife ngengozi yemota kumbe ngitshaywe lizulu laphansi,” kutsho uMnu Sibanda.
Uqhubekele phambili njalo walandisa ukuba lokhu edinga ukuba inyoka le yavela ngaphi njalo ngekabani.
“Ngikhuluma nje lokhu ngithithibele ukuba inyoka le yavela ngaphi njalo ngekabani. Nsukuzonke sihlala sikhuluma ngayo ukuthi senzeni ukuze sazi ukuthi inyoka le yavela ngaphi.
“Okungimangalisayo yikuthi ngethuba abaphurofethi laba bekhupha inyoka le babengathi baphethe inkalakatha yenyoka kodwa bathi sebefika lapha okwakutshiselwa khona izinto lezi bafika bakhipha inyoka engekho nkulu kodwa ephilayo,” kuphetha uMnu Sibanda.
