uMthunywa
Gladmore Ncube
KULENYANGA engatshiphanga eGokwe endaweni ebizwa ngokuthi yiMbungu okubikwa ukuthi ayelaphi nje ilomuntu phansi kodwa isimanga yikuthi sokuvele ukuthi isebenzisa igazi labantu abafileyo ekwelapheni izigulane.
Inyanga le esesengumfanyana uAmos Mawere kubikwa iguma layo alihambeki nanko phela lihlala ligcwele abantu bevela kude bezokwelatshwa izifo ezitshiyeneyo.
Intatheli ixoxe lesinye isakhamuzi sakule indawo njalo esingumfakazi oqotho (ibizo siligodlile) othe kunengi okungazwisisekiyo ngenyanga le.
“Inyanga le ayizwisiseki ngoba lapha ehlala khona kulala kukhala izikhova ebusuku njalo ingungu itshaywa kuze kuyephuma ilanga. Lokhu kusenza siyisolele ukuthi kukhona okubi ekwenzayo.
“Sike sezwa kuthiwa abantu nxa beselatshwa banathiswa igazi njalo inengi labantu lithi igazi lakhona ngelabantu abafileyo.
“Abanye ngabathi abantu laba uyabathakatha yena ngokwakhe esenzela ukuthi babuye kuye bazodinga usizo ngobunengi babo ukuze imali ingene,” kuchaza umfakazi oqotho.
Intatheli ikhulumisane njalo lomunye owake welatshwa yinyanga le, uMnumzana Fungai Machipisa othe welatshwa yinyanga le wasila.
“Bengiphathekile kakhulu inyanga ezinhlanu ezedluleyo kodwa sengisizwa ngcono kakhulu okutshengisa ukuthi inyanga isiyaphela ngiyabe sengisilile ngokupheleleyo.
“Mina ngibona angani ulesipho sakhe uMawere ngoba kusukela waqala ukungelapha sengizizwa ngiqinile sibili.
“Ngesikhathi engelapha wahlanganisa omunye umuthi legazi wathi ngilinathe. Ngezake ngitsho ukuthi ligazi lani sibisibili ngoba kazange aphawule ukuthi ngelani lokuthi walithatha ngaphi, mina nganatha kuphela ngoba ngangifuna ukusila.
“Kodwa bakhona abanengi abathi igazi lakhona ngelabantu ngoba besithi inyanga le igangile kakhulu,” kuchaza uMnu Machipisa.
Intatheli ikhulumisane njalo lomunye umfakazi owelatshwayo ongazange athande ukuveza igama lakhe othe kuliqiniso ukuthi ligazi labafileyo elasetshenziswa ukumelapha.
“Okwenza ukuthi ngithi ligazi labafileyo leli yikuthi ngemva kokusila kwami angizange ngikuthole ukuphumula, ngasengilala ngiphupha abantu engingabaziyo besilwa lami.
“Ngalokhu ngahamba esontweni ngayadinga ukuthi kuyini okungihluphayo ngathola ukuthi igazi leli ngelabantu abafileyo abangahambisani labakithi abaphansi yikho nje ngiphupha kubi,” kuchaza umfakazi lo.
UMnu Mawere ukulandule ukuthi usebenzisa igazi labantu abafileyo ukwelapha abantu ethi yena umsebenzi awenzayo usiza abantu abanengi njalo kalandaba lakho ngoba akwenzayo yikusiza abantu kuphela.
“Abantu vele bahlala belakho okokusola ngakho-ke ukuthi ngiyelapha ngegazi labantu kumbe elenkukhu angilandaba lakho ngoba mina engikwenzayo yikusiza imiphefumulo yabahluphekileyo.
“Ngezake ngivezele umphakathi umuthi wami ngoba waziwa yimi. Ngiyazi ukuthi kulenyanga efuna ukubakwazi ukuthi yini engenza ngelaphe ukwedlula yona, yikho nje ingithumela abantu ukuthi bakhulume abakufunayo ukuze ngiveze imfihlo yami, manje angisoze,” kuphetha uMnu Mawere.
