Uncategorized

Intsha yeNtabazinduna iqala indlela yokuziphilisa

14 Jan, 2016 - 00:01 0 Views
Intsha yeNtabazinduna iqala indlela yokuziphilisa Abasakhulayo beNtabazinduna belokhansila wabo uBekithemba Qongo esivandeni sabo

uMthunywa

Ethel Ncube
BAKHOMBA ngophakathi abasakhulayo kuWadi 5 eNtabazinduna ngemva kokuvula isivande abalima kiso izilimo ezitshiyeneyo njengendlela yokuziphilisa.

Isivande lesi sisungulwe ngomnyaka ophelileyo ngemva kokuba intsha yakulesisigaba inanzelele ukuthi yayingasebenzisa amanzi asemachibini engcekeza.

Intatheli ixhumane lomunye wabatsha uJonah Mutize ongomunye wabalima kulesisivande oveze ukuthi bakhangelele ukulima besiya phambili.

“Sananzelela ukuthi amachibi engcekeza la alamanzi  esingawasebenzisa sizithuthukise yikho nje savula isivande sethu. Lapha silima izilimo ezitshiyeneyo ezibalisa umumbu, amatamatisi lemibhida ukuze sithengisele abantu,” kutsho uMnu Mutize.

Uqhubekele phambili wachaza ukuthi injongo yabo yokuvula ingadi ngeyokuthuthukisa intsha lomphakathi.

“Ngokulima lapha sizama ukuthi abatsha abahlezi emakhaya bengasweli okokwenza kodwa balime bathole okokuziphilisa. Ngokuqalisa uhlelo lwethu lolu besidinga ukwehlisa indlala lobuyanga esigabeni. Inhloso yethu yikuthi izakhamizi zizethenga kithi umumbu kunye lezinye izilimo njengoba izulu lingananga kuhle kanje. “Isivande lesi sasisungula njalo ngoba sifuna ukugcwalisa injongo yeZim Asset ngokutshengisela ukuthi siyenelisa ukusebenzisa lokhu esilakho ukuzithuthukisa endaweni yethu,” kulandisa uMnu Mutize.

Intatheli ixhumane lesinye isakhamuzi uMnumzana Bongani Moyo oveze ukuthi ukusungulwa kwesivande lesi kulusizo olukhulu nanko phela sebethenga imibhida eduzane.

“Amalunga ephurojekithi le athi eqala ukucenta sawakhangelela phansi sithi vele azamani, kuzabehlula kanti balenjongo yokulima nanko phela sebelime izilimo ezizancedisa uzulu. Izakhamizi sezithenga eduze imibhida azisahlupheki ngokuya khatshana,” kutsho uMnu Moyo.

Iphephandaba likazulu libuye lakhulumisana lokhansila kaWadi 5 uMnumzana Bekithemba Qongo ochaze ukuthi bayajabula ngokuphumelela okwenziwa ngabasakhulayo.

“Abakwenzileyo lokhu kuyabukeka,  kutshengisa ukukhuthala nanko sebevule isivande basinceda ngoba imibhida lezinye izilimo sokufinyeleleka lula. Ngikhuluma nje banike izakhamizi ingxenye yeroli igcwele amatamatisi kungelambhadalo. Siyakubongela lathi, ngithi abuqhubekele phambili ngokulima,” kuphetha uMnu Qongo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds