uMthunywa
YiNtatheli kaMthunywa
LUPHENDUKE lwaba lusuku lwezililo usuku lokuzalwa komunye untombazana wePhambuka Line eTsholotsho ngemva kokudlwengulwa emcimbini wakhe wokuzalwa, uMthunywa uyakuveza lokhu lamhlanje.
Imbedumehlwana le yenzeke kumaviki amabili adluleyo ngemva kokuba lintombazana eleminyaka yokuzalwa engu-15 (ibizo siligodlile) ibanjwe iganyavu nguNqobizitha Moyo ohlala esigabeni esifanayo.
Ekhuluma lentatheli umfakazi ongathandanga ukuvezwa ngegama kodwa engomunye wemuli ubike ukuthi uMoyo wenza ulunya efuqwa butshwala kanye lezidakamizwa ayezinathe labangane bakhe.
“Untombazana owayethakazelela ilanga lakhe lokuzalwa wathaba kakhulu wacina enatha utshwala labangane bakhe. Ebona ukuthi wayengasaboni kuhle njengoba wayenatha ngitsho le-hot-stuff wahamba wayalala,” kulandisa umfakazi lo.
Kubikwa ngaleso sikhathi abantu bezikholisela phandle uMoyo wanyonyoba wangena ekamelweni lapho okwakulele khona untombazana lo wamdlwengula kodwa wasekhandwa ngelinye ilunga lemuli.
“Wazama ukuthi abaleke uMoyo kodwa abantu bamgijimisa bambamba.
Kubikwa kusenzakala konke lokhu untombazana lo wayelokhu edakiwe baze bamtshela ngelanga elilandelayo andubana bamuse esibhedlela ukuze ayehlolwa, okwenza uMoyo wabotshwa.
Isikhulumi samapholisa esabelweni seMatabelaland North uChief Inspector Siphiwe Makonese uvumile ukuthi udaba lolu baluthola.
“Samukele umbiko wentombazana edlwengulwe emthimbeni welanga layo lokuzalwa ngakibo ePhambuka Line, eTsholostho,” kuchaza uChief Insp Makonese.
Ubuye wathi abazali kumele baqaphelisise abantwana nxa besenza imicimbi efana lale.
“Ngithanda ukuxwayisa abazali ukuthi bananzelele abantwababo emicimbini enjengale njalo babelolwazi lokuthi bangaphi.
“Kuyakhathaza ukuthi indaba zokudlwengulwa lokhe zisanda esabelweni sethu seMatabeleland North njalo sicela ukuthi abafundisi kanye lababona ngabantwana bancedise ekuqedeni indaba ezinje,” kuphetha uChief Insp Makonese.
