|
|
|
Intombazana (11) ihlanza imbiza lenkonxa
NguNobuhle Mgwaqo
KUSEHLAKALO esinzima ukukholwa esitshiye izakhamizi zakoSipepa eTsholotsho zingelankani, kulontombazana oleminyaka engu-11 njalo oyintandane owahlanza imbiza lenkonxa lanxa imbangela ingazakali, uMthunywa uyakuveza lokhu lamhlanje.
Isehlakalo lesi esitshwaqisa umzimba senzakala okwamaviki amathathu ngenyanga kaMbimbitho eNkwalini Line khonale koSipepa.
Ugogo uNkosikazi Elinah Mpofu oleminyaka engu-70 onguye ogcine untombazana lo, uvumile ukuthi insindabaphenduli le yenzakala emzini wakhe njalo lokhu engalankani lalamhlanje.
“Mntanami lokhu ngingakukholwa lalamuhla lokhu okwakusenzakala kumzukulu wami ngoba ngicabanga ukuthi mhlawumbe ngamasalamusi,” etsho enyikinya ikhanda.
Uqhubekele phambili wathi imbiza yayiphuma injengoba injalo.
“Umzukulu wami wakubona okukhulu sibili, wayekhupha imbiza, inkonxa kunye lemiganu ngomlomo.
“Izinto lezi zaziphuma zinjengoba zinjalo emlonyeni wakhe njalo kwezinye izikhathi zazifika zime emlonyeni engasenelisi lutho ngoba esizwa ubuhlungu ngize ngiguqe phansi ngikhuleke ukuze kuwele phansi lokhu okuyabe sekuphumile esiswini.
“Ngabiza wonke umuntu, osobhuku ngitsho lamapholisa ukuthi bazongibonisa limhlolo ngesikhathi kusenzakala,” kutsho ugogo lowo.
Ebuzwa ukuthi imbiza lezo zazivela ngaphi uthe imbiza yayicatsha endlini bayibone isikhitshwa ngulowo mntwana.
“Ngesikhathi kusenzakala lokhu ngangisehluleka ngitsho lokudla lalamhlanje ngingakucabanga lokhu ngizizwa ngitheneka amadolo ngoba lokhu ngingakwazi ukuthi yisiga bani kumbe njalo ngamasalamusi,” kutsho uNksz Mpofu.
Wengezelele wathi umntwana lo wayephela kuphela amandla ngesikhathi ekhipha imbiza yakhona kodwa kungedlula wayesithi kezwa buhlungu.
UMthunywa uxoxe lontombazana lo obike ukuthi kwesinye isikhathi ubethi nxa esiya ngaphandle ubephuma amanalithi.
Ugogo ebuzwa ukuthi ucabangela ukuthi lokhu kungabe kubangelwa yini uthe yena kakwazi ukuthi kungabe kubangelwa yini.
“Mina mntanami ngikhonza iSabatha njalo sifundiswa ukuthi singakhombi abantu ngeminwe kungakho akakho engimcabangela ukuthi engabe elesandla kulokhu. Lakhathesi ngiqina ngemithandazo nje kuphela.
Uma kuyikuthi ukhona olesandla uzajeziswa ngumdali,” kutsho ugogo. |
|
|