|
|
|
Asekhithika amaStudio eMontrose
YiNtatheli kaMthunywa
ABALALELI bomsakazo weSFM abavela kuzabelo zeMatabeleland sebelenyanga ezimbili amawayilesi abo engabambi amagagasi omsakazo lo.
Ukungabambi kwamagagasi la kubikwa sokubangele ukuthi abalaleli bomsakazo lo balahlekelwe zinhlelo ezinengi kakhulu.
Kufike endlebeni zikaMthunywa ukuba izisebenzi zomsakazo lo ezisebenza ema-studios eMontrose edolobheni lakoBulawayo zitshona zitshaye amangqetshane ngenxa yokungasebenzi kwe-transformer ehambisa amagagasi la.
“Kusukela kunyanga ezimbili ezedluleyo kasisebenzi sifika sikwejise emsebenzini ilanga lonke.
“Inhlelo zonke ezivela koBulawayo kaziphumi emsakazweni wethu ngenxa yokungasebenzi kuhle kwemitshina ehambisa amagagasi.
“Asikwazi ukuthi umtshina lo uzalungiswa nini njengoba singakatshelwa ngabaphathi bethu abasebenzela emawofisini amakhulu eHarare,” kutsho umfakazi oqotho ongathandanga ukuqanjwa ngebizo.
UMthunywa uzwile njalo ukuthi indawo edlela izisebenzi (staff canteen) seyaguqulwa yenziwa ibhawa, ikakhulu ngoLwesihlanu.
“Kusukela emini ngehola lesithathu kuze kutshaye ihola lesikhombisa ngoLwesihlanu kuyabe kufiwa la. Indlamanzi ziyabe zizikholisela kuthi lenyama yokosa iyabe ithe hlikilili, kulesaziso vele esithi sinxuse labangane bethu,” kuchaza omunye umfakazi njalo.
Inhlelo ezifana leGrandstand kuSFM, ebezikholisisa abalaleli ngoba ngezemidlalo azisekho kanti leNational FM, ebisisakaza iphuma eMontrose ngenxa yokubana isakaza ngendimi ezehlukeneyo ezifana leTonga, iNambya, iSiKalanga, iSiNdebele kanye lezinye ezehlukeneyo layo isiphuma ivela eHarare.
Kunyanga ezisanda kwedlula, iqula lePhalamende elibona ngokukhitshwa kwemibiko lokusakaza liveze ukudana ngemitshina esetshenziswa ukusakaza eMontrose Studios.
Iqula leli elalikhokhelwa nguMnumzana Gift Chimanikire lathembisa ukuthi udaba lolu luzaphawulwa edale lephalamende.
Lobanje izizalwane zakulumhlubulo zingatholi imisakazo yazo, inkampani le ikuthatha njengeze ukuthi ixolise ngesehlakalo lesi.
Kuyonale iviki inkampani yeZBH ivule amagagasi eRadio Zimbabwe kanye lePower FM kuzakhamuzi zesabelo seMatabeleland South.
Isikhulumi senkampani yeZBH uMnumzana Sivukile Simango uthe inkampani yakhe kayilani lokuqondiswa kwamagagasi.
“Inkampani yeZBH kayilani lokuqondiswa kwamagagasi, inkampani yeTransmedia yiyo elolwazi ngokuqondiswa kwamagagasi wonke omsakazo wewayilesi.
“Kumalanga amalutshwana azayo sikhangelele ukunika umbiko kubalaleli beSFM mayelana ngokulahlekelwa kwabo ngamagagasi omsakazo lo” kubika uMnu Simango.
Osaphethe isikhundla sikamaqhuzu wenkampani yeTransmedia uMnumzana Fufaro Zvaranyika uthe inkampani yakhe leye TelOne baphakathi kokulungisisa imitshina ethwala amagagasi esesigodlweni eHarare.
“Ukungasebenzi kwemitshina yenkampani yeTelOne yikho okubangele ukuthi indawo ezinengi zingabambi amagagasi omsakazo weSFM.
“Kungathatha ezinye inyanga ezimbili ukuthi silungise imitshina le ngenxa yokuthi ithengwa kwamanye amazwe,” kutsho uMnu Zvaranyika. |
|
|