|
|
|
‘Lanxa sisenkambeni buyanathwa’
NguNkosilathi Sibanda
Kulandela ukuvezwa kokubana abadlali beBosso bavele baphila ngotshwala, iphephandaba likazulu liyakuveza lamhlanje ukubana utshwala lobu abunathwa uma besezindlini zabo kuphela kodwa lasenkambeni uqobo ngesikhathi bemelele umdlalo.
Kubikwa abanye abadlali bayathwala imigqala yabomathoba befihle ezikhwameni zabo ngoba besazi ukuthi akula ozabakhuthuza (search) ezikhwameni zabo.
Imizamo yokukhuluma lomaneja weHighlanders uDouglas “British” Mloyi yehlule kodwa umgcinisihlalo waleliqembu lendlamanzi zabadlali, uThemba Ndlela utshele iphephandaba leChronicle ukubana udaba lolu bazalucubungulisisa njengekomithi.
Uthe ngeke bona njengenkokheli zeHighlanders bevume ukuthi iHighlanders idlalelwe yizidakwa.
“Lolu ludaba okumele silukhangelisise ngokuphazima kweso, ngeke savumela into enjalo, njalo labo esizafumana ukuthi bakwenza sizabajezisa okuzwayo,” nguNdlela lowo.
NgoLwesibili lweviki edluleyo abadlali beHighlanders bakhalala ukulolonga bethi bafuna izimali zabo kuqala. Akwazakali ukuthi ukukhalala lokhu kwakuseqinisweni kumbe babevele befuna ukuyabhudla utshwala loHonour Gombami, owayebuyela kweleBelgium ngoLwesithathu.
UMthunywa uzwe kuthiwa kulelidili kwakulabadlali abayisikhombisa kugoqela ukaputeni wabo uGilbert Banda.
Abanye kuthiwa nguLawson Nkomo, uMernard Mupera, uChipo Tsodzo, uBekithemba Ndlovu, uJoel Luphahla kanye loSizabantu Khoza.
Izazi ngokubunjwa komzimba womuntu zibike ukubana utshwala buhlala emzimbeni okwamalanga amabili kusiya kwamathathu, okutsho ukubana abadlali laba balolonga bevele bezibonela ntuthu.
Ngaleyoviki kutsho ukuthi babubhudla okwamalanga amathathu balolonga amalanga amathathu andubana beyebhaxabulwa 3-1 yiCAPS United eHarare.
Kuvele kuyazakala ukuthi abanye abadlali bayanatha utshwala kodwa kumele bazi ukuthi impilo yomdlali wenguqu incane kakhulu ngakho umuntu kumele aziphathe, atshengisele ukuzimisela. Inengi labadlali livele lizikholisela ngoMvulo kuthi ngoLwesibili sekuyiwa gijinywa okuzwayo.
Yikho vele abaqeqetshi beqala ukufundisa ngamasu abo ngoLwesithathu ngoba besazi ukuthi ngoLwesibili akulalutho olungangena.
Kusenjalo inhlanganiso yePSL isikhuphe uluhlu lwemidlalo yangempelaviki.
Iqembu elisakhokhela ilogu, iMotor Action lidibana leKiglon enkundleni yeDzivarasekwa.
Lingena enkundleni lingelamqeqetshi walo uJoey Antipas kanye lokaputeni uBhekimpilo Ncube.
Ababili laba basemsebenzini welizwe eSeychelles lapho iZimbabwe edlala khona lalelilizwe kunkezo yeCHAN.
IBantu Rovers, ephakathi kobunzima obukhulu, iphuma ijumo njalo isiya esigodlweni ukuyadlala leDouglas Warriors kuthi iBlack Mambas idibana leMonomotapa enkundleni yeMorris Depot.
Imidlalo le yonke ikusasa kanti ngeSonto iFC Victoria yamukela iEagles enkundleni yeMucheke.
Enkundleni yeBarbourfields, iqembu elaxotshisa abaqeqetshi ababili kuBosso iminyaka ilandelana iLengthens, lizabe likhangelele ukuthi lesule masinyane ukubhulwa kwalo 5-0 yiGunners ngempelaviki edluleyo. Lidibana leTshilamoya.
Kodwa ke abafana bakaMohammed Fathi bakhangelelwe ukuthi bethi “hwapu hwapu” bayebubhudla!
Nantu uluhlu lwemidlalo yePSL olugcweleyo
Kusasa: Douglas Warriors v Bantu Rovers (Rudhaka); Kiglon v Motor Action (Dzivarasekwa); Black Mambas v Monomotapa (Morris Depot).
NgeSonto: Highlanders v Lengthens (Barbourfields), FC Victoria v Eagles (Mucheke). |
|
|