|
|
|
Uvuka emathuneni umdlalo wethenisi koNtuthu
NguNkosilathi Sibanda
INKUNDLA yeBulawayo Athletics Club (BAC) ebikade ihlezi ingasetshenziswa izagcwala imhlambi yabalandeli ngeSonto lapho okuzabuthana khona abadlali bethenisi bakoNtuthu kumqhugelwano weOpen Tournament wona osuleminyaka emine wamiswa.
Umncintiswano lo ukhangelelwe ukuthi uvuselele ithenisi yakoNtuthu yona ebisitshabalala. Intshantshu kulumdlalo kubikwa zizadibana okwamalanga amane.
Inhlanganiso yeBulawayo Metropolitan Tennis Board eyiyo eqoqa lumkhosi ibike ukuba inxuse izikolo zakoBulawayo zonke ezidlala ithenisi ngoba bekhangelele ukukhetha iqembu elizamela isabelo seMatabeleland elizakuya esigodlweni ngoNcwabakazi.
URaggs Joelson ongomunye wabaqoqi balumncintiswano ubikele iphephandaba likazulu ukuba amalungiselelo abo asebanga emaphethelweni njalo balungise uhlelo oluzabiza lalabo abayizondayo ithenisi.
“Siphume lohlelo lokuthi senelise ukunxusa labantu abangawuzwisisiyo umdlalo wethu ngoba sikhangelele ukukhankasa edolobheni lakoBulawayo kanye lakuziqinti zezabelo zeMatabeleland. Lokhu senzela ukuthi sibumbe iqembu leMatabeleland elipheleleyo,” kutsho uJoelson.
Uthe inhlanganiso yakhe ikhangelele ukuthi kubelamathimu ayisithupha alabadlali abalitshumi inye ngayinye. Kumathimu la kubikwa kuzaphuma iqula lamantombazana ama under-12 kanye lelama under-18 elabafana.
Ngalimpelaviki abanye abadlali bakoNtuthu bavakatshela ezintabeni ze-Eastern Highlands ukuyancintisa kuManicaland Open eqalise lamhlanje ekuseni.
IBulawayo zintshantshu zalumncintiswano okwenze uJoelson wafunga ukuthi abafana bazayiphendukisa njalo inkezo kulelidolobho.
“Inkezo yeManicaland ngeyethu. Loba ithenisi yakoBulawayo ibikhanya angathi iyawa, lonyaka sizatshengisa ngenkani ukuthi sizintshantshu.
“Ngesikhathi amathimu abadlali abancinyane elapha, abadlali abakubanga eliphezulu sikhuluma nje baseMutare kuwonalo umncintiswano weManicaland.”
Phakathi kwabadlali laba abaseMutare kulendlikizane yomfana uThelsely Mufunda ovuthela ibhola sengathi uyavukelwa.
UMufunda abanengi basamkhumbula esesengumfanyana ngo2005 esadlalela isikolo seHamilton kanye ledolobho lakoBulawayo lapho ahluthuna khona inkenzo yeOld Mutual eleminyaka elitshumi lane kuphela.
Okwamanje lumfana useqeqetsha abantwana abamela iBulawayo kuma-Youth Games.
Uthe uzizwa eseyindoda ngoba uzadibana lengqwele zethenisi ezibalisa uMartin Dzuwa loLibert Nzula. |
|
|