|
|
|
IHwange ithumela iDynamos amasamanisi
YiNtatheli kaMthunywa
INKOKHELI zeqembu leHwange kubikwa sezithumele iDynamos amasamanisi wokuthi nxa ingehluleka ukuhlawula imbhadalo yokudlalisa uFarai Vimisayi okungekho emthethweni lamhlanje, kuzamele loludaba lubanjwe zinhlanganiso zeZIFA lePSL.
UVimisayi ubedlalela iHwange kusizini edluleyo kodwa wasehluthunwa yiDeMbare okubikwa ilokhe isehluleka ukuxolisa iChipangano kanye lokuthi ikhulume ukuba imali le izakhutshwa nini.
IDynamos yenza ekujwayeleyo ngokutshontsha lumdlali owabonakala esedlala kweminye imidlalo abaqeqetshi labakhokheli bakhe bengakwazi.
Kuviki edluleyo iHwange ilobe incwadi kuziphathamandla zeDynamos ibika ukuthi kabalungise isikwelede lesi kungakafiki umhlaka 11kuNkwenkwezi kodwa incwadi le kukhanya yafikela kuzacuthe khonale esigodlweni.
Kulandela ukudelela okwenziwa yiDynamos kubikwa eHwange inhliziyo zibuhlungu osekudale ukuthi inkokheli zeColliery zithi zona sezigeze izandla ngoba sezikhulume kwathophela.
UBurzil Dube oyisikhulumi kanye lonobhala weHwange FC ubikele iphephandaba likazulu ukubana udaba lukaVimisayi alubaphathanga kakuhle njalo sebecabanga ukuthi iDynamos isithembe okunye okuthize ukuthi icatshise umdlali lo.
“Indaba le mfowethu isidida amakhanda lapha eHwange. Abadala bethimu bayakhala njalo sebenikeze iDynamos ilanga elilodwa ukuthi icace ngokukhipha imali yethimu.
“Bengehluleka, sidlulisela phambili udaba kubakhokheli beZIFA lePSL ngoba thina kukhanya siyadeleleka.
“Manje asibuyeli emuva ngoba umfana ngowethu kumele ahlawulelwe,” kutsho uDube.
Ebuzwa ngokuthi uVimisayi uthengiswa ngemalini, uDube uthe okumunyethwe yisivumelwano ngeke wakuphawula kumaphephandaba.
“Imbhadalo yomfana iyimfihlo ngoba iphakathi kwesivumelwano sethu leDynamos.”
Loba eyalile ukuchathekela uzulu ngesikwelede seDeMbare, uMthunywa uzwe kamhlophe kubafakazi abaseduze labafana bemalahleni ukuba uVimisayi uyintengo efika i$25 000 njalo iHwange isijnyathele umduli ngalokho.
UDube uveze njalo ukuba uVimisayi loba efisa ukuhlala kuDynamos akusoze kwenzakala nxa iHwange ingatholanga imali yayo.
“Umdlali wethu uVimisayi laye sameluleka ukuthi kasumdlali weDynamos ngoba kahlawulelwanga.
“Nxa kuyisifiso sakhe sokudlalela iqembu leli, kumele amelele ukubhadalwa ukwenzela ukuthi abengumdlali osemthethweni,” nguDube lowo obezwakala ecunuke kakhulu ngesenzo seDynamos.
NgeSonto edluleyo iDynamos itshiye izimbamgodi zigodola okuzwayo ngemva kokuzibhula 2-0.
Iqembu leDynamos kukhanya liqalise isizini liziqhenya ngokudlalisa abadlali abathethwe ngesikwelede abangenelisiyo ukusigcwalisa nanko kuvuka umsindo iChapungu FC layo ngekhalaza ngokusetshenziswa kukaCuthbert Malajila.
UMalajila ufike kuDynamos evela kuBosso kodwa engumfana weChapungu. Ithimu yakhe izwakala kumaphephandaba isithi ifuna i$24 000.
Udaba lukaMalajila kuzwakala selubanjwe ngabalandeli beDynamos bona okubikwa baphezu kokukhankasela ukuthi umlandeli munye ngamunye akhiphe i$1 ezangena esikhwameni sokuthenga lumfana. |
|
|