|
|
|
iEconet iqonde nta
Esidikidikini sezemidlalo
Lizangixolela ngoba ngeviki ephelileyo bengithe sizaphatha udaba luka Cuthbert Malajila lo Matthew Mahala kodwa ngokuswelekala kwenhlanhla umtshina wami wokwethula incwadi ngobulembu isuke yabalenkinganyana ngakho angisenelisanaga ukufinyelela imibono yenu ngodaba lolu.
Kodwa kungasenani ngisuke ngathi simintaminte ngodaba olusegudwini kulezinsuku. Loludaba ngoluphathelane le-sponsorship yeligi yethu lonyaka.
Abantu abanengi abangabalandeli bomdlalo webhola ngokubona ingozi yokuswelakala kwe-sponsorship yeligi bakuthathe bakwenza umthwalo wabo ukuzama ukuncenga iEconet Wireless ukuthi ixhase iligi kule isizini. Kasiphangeni sikubeke ukuthi lokhu kubeyizithukuthuku zenja ezimane ziphelele eboyeni.
IEconet iwutsakele umzamo lo ngendelelo ebiwulingene lo umzamo. IEconet ifunge yagomela yathi yona kayifuni ukubonakala incwebelana igwayi lebhola leZimbabwe ikakhulu kuzinga lwePremiership.
Lokhu kakuzange kumangalise muntu. Omangaliswe yilokhu ufana xathu lomuntu ongamaliswa lilanga liphuma.
Into njeyikuthi kusuke kukhanye sengathi iEconet ilolunya kanti hatshi. Inkinga lapha kasiyo iEconet kodwa ngabantu abangafuni ukukhuluma iqiniso. Intathelizindaba ezinengi esezilobe ngodaba lolu kazilikhulumi iqiniso. Ziloba zigudlisa zitshaya inja zifihle umphini.
IEconet yaphuma kundaba zebhola ngemva kokuphathwa butshapha yinkokheli yebhola yePremiership. Ubutshapha bavela kukungahloniphi isivumelwano lemithetho yokudlelana kuhle kubhizimusi. Inkokheli yebhola yaleso sikhathi yangenwa yibuhwaba lokuba lombono ofiphileyo bakhohlwa ukuthi kusasa kuyizolo.
Kwakungeke kwenze ukuthi baphoqele iEconet ukuthi ingene esithenjini lonyanewayo kubhizimusi lokwethula imibiko ngomoya kungasetshenziswa incingo.
Ngokwala ukusetshenziswa kusivumelwano lesi ebesikade sikhankaselwa ngabalandeli bomdlalo ku-Facebook, iEconet itshengise ubungcwethi bokuziphatha kundaba zokuqhuba ibhizimusi. Baveze ukuba-principled lokuba lama-ethics alohlonzi.
Ibhola lethu lingcoliswa ngabantu abangelama-ethics njalo abakhokhelelwa yibuhwaba lobugovu obungelamkhawulo. Ngaphandle kokuba lababantu batshiye le imikhuba kasiyindawo ngebhola lethu leli. Ama-interested parties kawatshiyane lebhola lethu badinge kwezinye indawo.
Ngeke kwenzakale ukuthi amankampani abhejele ukunika imali amathimu kulokuthi baphe isikhwama esikhangele amathimu la. Kukhona okutshaya amanzi lapha. Ikhona inkulumo engakaphunyiselwa phandle. Kayiphume siyizwe.
Ngakhuluma kumaviki ambalwa edlulileyo ukuthi i-partnership yeZBH le PSL eyalotshelwana ekuqaleni kwesizini le kayisoze isebenze. Into engangiyitsho yiyo kanye le xathu esiphuma khathesi. Nxa kuyikuthi amankampani abona ibhola lethu ngendlela iEconet elibona ngayo yiwaphi ke lawo azathenga i-advertising space kumidlalo le?
Intatheli zethu eziseHarare zithe ziloba ngodaba lweEconet zathi, Econet not reachable. Mina ngithanda ukuthi akunjalo, okukhona yikuthi, “The number that PSL have dialed is no longer in use.”
Kasi hlanganeni ngeviki ezayo lapho engithemba sizakhangela olunye njalo udaba olusegudwini kwezemidlalo.
Asixoxeni ebulenjini ku-mdumoyo@yahoo.com. |
|
|