|
|
|
Ngizadlala kuphela:Ballack
BBC
UKAPUTENI weGermany uMichael Ballack uqhubeka ngokuthi uzadlala kumncintiswano wendebe yomhlaba kunguqu kungakhathalekile ukuthi uyaliswa ukuthi adlale ngenxa yokulimala inqagala.
Umdlali waphakathi lo kuqembu leChelsea walimala kuFA Cup mhla bedibana lethimu yePortsmouth ngoMgqibelo odluleyo.
“Kangingeke ngekela umsebenzi wami ulahleka nje ngibhekile ngenxa yolunya engalwenziwayo,” kutsho uBallack oleminyaka engu-33.
UBallack osedlalele ilizwe lakibo kumidlalo efika-98, wadlala kuma-World Cup amabili adluleyo kodwa okwamanje kubikwa kumele aqale ahlangane amathambo enqagala ukuze aqalise ukulolonga kumaviki ayisitshiyaminwe mibili alandelayo.
Umdlalo wakuqala welizwe leGermany umhlaka 13 Nhlangula, okutsho ukuthi kumele azimisele ukubukela umdlalo lo esebhentshini.
“Ngenza konke okusemandleni ami ukuthi siye kweleSouth Africa kodwa iWorld Cup isisiyadlalwa ngibukele okuyinto ebuhlungu kakhulu kimi,” kutsho uBallack.
Uqhubeke wathi kubuhlungu sibili ukulinyazwa kumdlalo wokucina we-season.
Abalandeli kanye labosiyazi benguqu bathi ukudlala kundebe yomhlaba eSouth Africa bekungabe kungokokucina kulumdlali empilweni yakhe kunguqu.
UBallack waqhuzuka waze wakhitshwa emdlalweni weFA Cup ngemva kokudlala imizuzu eyi-25 kuphela.
UKevin Boateng ovala emuva kuthimu yePompey nguye okubikwa wanyathela uBallack kakubi kulumdlalo. Umdlali lo oqhamuka eGhana kunakanelwa ukuthi angabe ekhona kumdlalo ozabuphakathi kweGermany lamaBlack Stars eGhana kuqula lika-Group D.
UBoateng uxolisile kuBallack wathi kenzanga ngabomu ukumnyathela.
“Ngimngene ngingakhangelelanga ukumnyathela. Engikwenzileyo yibuwula sibili,” nguBoateng ekhuluma lentatheli ebulenjini.
Lokhu kubikwa sekuzondise abalandeli beGermany asebezimisele ekuthini bathi uBoateng yisitha sabo ngoba sebegcwalise imbiko yokuzonda lumdlali ebulenjini.
Eminye yalimbiko ithi “Phansi loBoateng.”
UBoateng wazalelwa kweleGermany kodwa wakhula eseGhana kukanti umfowabo uJerome kubikwa ukhethwe kuthimu yakuqala eyeGermany ezakuya kweleSouth Africa.
Sekunjalo, uBallack ulenkinga okumele azilungise mayelana lempilo yakhe kunguqu ngoba kubikwa isivumelwano sakhe leChelsea siphela ngenyanga kaNhlangula.
Umdlali lo utshele intatheli zakweleNgilandi ukuba iChelsea yithimu yakhe yokuqala, kayindawo.
“Sisakhulumisana leqembu leChelsea. Umqeqetshi wami ufuna sikhulume ngendaba le sisodwa.”
UBallack watshengisa ubungcitshi bakhe ngo2008 kumncintiswano weEuropean Champions lapho iGermany eyacina isinqotshwe 1-0 liqembu leSpain.
Ku-World Cup ithimu yeGermany izaqala ukudlala leAustralia mhlaka 13kuNhlangula iqhubeke idibane leSerbia mhlaka 18 kanye leGhana mhlaka 23 wenyanga efanayo.—BBC. |
|
|