|
|
|
Ihanyanisi kayisiyo yesitshebo kuphela
YiNtatheli kaMthunywa
IHANYANISI akumelanga siyithathe kancane ngoba ilomsebenzi omkhulu emzimbeni womuntu.
Yebo ungehlisa inyembezi ngesikhathi uyisikelela kumbe unuke umlomo ngemva kokuyidla kodwa zifundise ukuyithanda ngoba ilamandla.
Ihanyanisi kayisiyo yokufaka esitshebeni ukuthi sinambitheke ngcono kumbe njalo ukuthi sinukelele nje kuphela kodwa iyelapha.
Ilakho ukuphathisa olenhliziyo emnyama ukuze athole umfutho wokudla. Okwenzayo yikuyisikelela ndawonye lamatamatisi uthele isawudo uzidlele.
Ababona ngezempilakahle bathi ihanyanisi ilakho ukuthi ikuphathise nxa ulomkhuhlane wetshukela kumbe uleHigh Blood Pressure(BP) kumbe lanxa ulunywa emzimbeni.
Okwenzayo yikuthatha isiqa sehanyanisi engakadabuki, unathe umhluzi wakhona inkezo ezintathu kumbe ezinhlanu ngelanga.
Nxa uhlutshwa yiBP kumbe ngumkhuhlane wetshukela uthatha i-4grammes yehanyanisi ufake ku-100ml yamanzi, ubilise anduba wekele okwemizuzu engamatshumi amathathu. Unganatha umuthi lo, kathathu ngelanga.
Nxa usizwa isikhumba sakho siluma kumbe ulunywe yisibungu thela umhluzi lo lapho okuphuma khona igazi kumbe uhlikihlele lapho olunywa khona.
Ukudla ihanyanisi engaba yingxenye yenkomitsho ngeviki kulola ingqondo zakho njalo kuyazivikela ukuthi umuntu engahlali ekhohlwa.
Ihanyanisi iyenelisa ukubulala izibungwana ezilakho ukuba phakathi kwamathumbu amakhulu ngoba ilomuthi obizwa ngokuthi yi-Bifidobacteria oyiwo obulala izibungwana. Umuthi lo ulakho ukubulala ngitsho lamathumba akhula phakathi kwamathumbu amakhulu.
Ababona ngezempilakahle bathi ngemva kokuhlola ukudla okudliwa ngabantu abathile bananzelela ukuthi abantu abadla ihanyanisi nsukuzonke balakho ukuthi behlise amathuba abo okuba lemvukuzane.
Nansi ingqobe, zama ukuthi nsukuzonke nxa usidla ubone ukuthi kulehanyanisi emganwini wakho ubone kumbe impilakahle yakho kayiguquki. |
|
|